kommunimut qinersineq
Atassummit qinigassanngortittoq: Kujataani kommuni amerlanerusunik periarfissinneqarli
Pisortani suliffiit sinerissamut siammarterneqarnissaat piffissanngortoq, Bentiaraq Ottosen (A), Kommune Kujallermi kommunimut qinigassanngortittoq isumaqarpoq.
Kommune Kujallermi innuttaasut ikiliartorput. Maanna iliuuseqartoqartariaqarpoq, Kujataani suliffissat amerlanerulerniassapput.
Bentiaraq Ottosen kommunimut qinersinissamut Kommune Kujallermi Atassummit qinigassanngortittoq taama oqarpoq.
Atuaruk: Namminersorlutik Oqartussat suliffeqarfiit ukiormanna sinerissamut nuunnianngilaat
Unammilligassat annertuut pingasut
- Naalakkersuisut piumaffigineqartariaqarput ineriartortitsinermi peqataanissaminnut kommunit tamarmik illersortariaqaraat. Taamaalilluni kommuni aamma allat eqeersimanerulissagaluarput Kommuneqarfik Sermersuutut pilersaarusiorsinnaalerlutik, Bentiaraq Ottosen oqarpoq.
Kommune Kujalleq annertuunik pingasunik unammilligassaqartoq taanna oqarpoq.
- Suliffissaqarnikkut, ineqarnikkut aammalu inukilliartornermigut. Tamakku pitsaanerusumik ineriartortissagutsigit isumaqarpunga piffissanngortoq Kommune Kujalleq suliffissanik nutaanik arlaqartunik pilersitsisariaqartoq, Naalakkersuisulli piumaffigisariaqaraat suliffeqarfiit nuussorneritigut, Bentiaraq Ottosen erseqqissaavoq.
Atuaruk: Innuttaasut ikiliartorput - borgmesterip naligiinnerunissaq piumasaraa
Suliffiit maanna nuunneqarlik
Taassuma innuttaasut kommunimit nuuttartut ingammik ernumassutigai.
- Kommune Kujallermi missingersuutit qiviarutsigit, tassa imaappoq ukiumut agguaqatigiisillugit innuttaasut 100-t kommunimut allamut nuuttarput. Tamannalu ernumassutigaarput, taamatulli pinngitsoortissagutsigu Naalakkersuisut piumaffigineqartariaqarnerat suliffissanik pilersitsinikkut periarfissiisariaqartutut tunniussaqartariaqartut suliffeqarfiit Kommune Kujallermut nussorneratigut, Bentiaraq Ottosen allappoq.
Atuaruk: 'Kommunalbestyrelsi nukilaappallaartoq innuttaasut nuuttarnerannut pissutaasoq'