Namminersorlutik Oqartussat suliffeqarfiit ukiormanna sinerissamut nuunnianngilaat

Kommune Kujallermi, Qeqqata Kommuniani aamma Qaasuitsup Kommuniani borgmesterit pisortat suliffeqarfiutaasa sinerissamut nuussorneqarnissaat kissaatigaat.

Kisianni Namminersorlutik Oqartussat pisortat suliffeqarfiutaat ukiormanna nuussussagaat borgmesterit naatsorsuutigissavaat.

Atuaruk: Siunnersuut: Nuummi suliffiit 600-t ukununnga nuussapput

Ukioq manna nuussuisoqassanngitsoq
Tassami ukiormanna pisortat suliffeqarfiutaaasa nuussorneqarnissaat Naalakkersuisut naatsorsuutiginngikkaat, aningaasaqarnermut naalakkersuisoq Aqqaluaq B. Egede (IA) Inatsisartunut ilaasortap Viviani Motzfeldtip allagaqarluni apeqquteqaataanut akissuteqarluni allappoq.

- Aalajangiinerit taama ittut aningaasanut inatsimmut sunniuteqassasut naatsorsuutigineqartussaapput taamaattumillu aningaasanut inatsisissatut siunnersuummik suliaqarnermut atatillugu Inatsisartunit akuerineqaqqaartussaassallutik, Aqqaluaq B. Egede Viviani Motzfeldtimut akissuteqarnermini taama allappoq.

Atuaruk: Borgmesterit pisortani suliffiit sinerissamut nuutsikkusuppaat

Vivian Motzfeldtip aamma siunissami Namminersorlutik Oqartussat suliffeqarfiutaat nutaat qanoq pingaarnersiorneqarlutik tulleriiaarneqassanersut, tassa Danmarkimit akisussaaffiit tiguneqartussat ilanngullugit apeqqutigai.

Pisunut ataasiakkaanut ataatsimut isiginninnikkut Naalakkersuisut isummertassapput, soorlu suliassat pituttorsimasut toqqissisimanartumik suliarineqarnissaat pillugu sulisussanik kiisalu pitsaasumik aningaasaqarnermik qulakkeerinninneq, aningaasaqarnermut naalakkersuisoq ilisimatitsivoq.

- Tassunga atatillugu ilaatigut aamma inissiiffissat tulluartut isumaliutersuutigineqassapput, tassani inissiiffigineqarsinnaasut assigiinngitsut misissorneqassapput, Nuullu avataani inissinneqarsinnaanerinnut periarfissat aamma misissorneqassallutik, Aqqaluaq B. Egede oqarpoq.

Atuaruk: KANUKOKA: Suliffiit sinerissamut nuunneqarlik