kulturi
Assit takukkit: Eqqumiitsuliortut Nuummi katersugaasivimmi ineqalerput
Illoqarfiit pingaarnersaat eqqumiitsuliortunut attartortittagassamik inissaqalingajalerpoq
Eqqumiitsuliortunik Kalaallit Nunaanneersut aamma nunat avannarlerneersut Nuummi Eqqumiitsulionermi Saqqummersitsivimmi ineqarsinnaasalissapput.
Suliap pilersinniarnera aammalu fondinut qinnuteqaqattaarneq ukioq ataaseq ingerlasimareerluni massakkut saqqummersitsivimmi inissat iluarsartuunnerat aaqqissuinerlu suliarineqarput. Inissanullu qinnuteqarsinnaanerit aallartereerlutik.
Ataatsimoorfimmik pilersitsisoq
NAPA, Nunani Avannarlerni Piorsarsimassutsikkut Attaveqaat, Nordisk Ministerrådip ataaniittoq suliami tapersersuisuuvoq suleqataallunilu, aammattaaq Kulturkontakt Nord tapeeqataalluni.
Nuummi Eqqumiitsulionermi Saqqummersitsivimmi aqutsisup neriuutigaa, illoqalernerani paarlaaqatigiinnerit annertuninngornissaat, Kalaallit Nunaannilu eqqumiitsuliortut aamma nunani allani eqqumiitsuliortut akornanni ataatsimoorfinnik pilersitsissasoq.
Atuaruk: Nuuk eqqaamasanut katersugaasivittaarpoq
- Sinnattorisimasaq piviusunngortinneqarpoq, Nivi Christensen oqarpoq.
- Eqqumiitsuliortut sivisunerusumik inissisimaffigisinnaasaannik inissaateqalerpugut, takornariaannaanaatik, kisiannili Nuummi kultuurip aamma eqqumiitsuliornerup silarsuaanni peqataasinnaanngorlutik.
Ukiamut aallartissasoq
Eqqumiitsuliortut sisamat nunat avanarlerneersut Nuummi Eqqumiitsuliornermi Saqqummersitsivimmi najugaqarsinnaaniassammata sulisinnaaniassammatalu Kulturkontakt Nord aningaasanik tunisisimavoq, timmisartumut bilitsinut aamma nerisaqarnermut atugassanik.
Eqqumiitsuliortoq siulliulluni tikittussaq oktoberip novemberillu akornani inissinnissaa pilersaarutigineqarpoq, tullialu decemberip januarillu akornani inissinnissaa pilersaarutigineqarluni.
Ineeqqap aappaa eqqumiitsuliortunit nunatsinneersunit inigineqarsinnaassaaq, soorlu saqqummersitsilernermini inisimasinnaalluni.
Suleqatigiittorpassuit
Eqqumiitsuliortunik inissisimasoqarsinnaaneq Nuummi eqqumiitsuliornermik ineriartortitsinermik peqataanissaq tapersersuinissarlu ineqartussanut innersuussutigineqarput, aammattaaq ineqartussanit naatsorsuutigineqarpoq Nuummi innuttaasunut ammasumik sammisaqartitsinissaat allatulluunniit pisoqartitsinissaat.
Katuaq, Eqqumiitsuliornermik Ilinniarfik aamma KIMIK ineqartunit suleqatigineqarnissaat naatsorsuutigineqarpoq, aammalu Nuummi Eqqumiitsuliornermik Saqqummersitsivimmi saqqummersitsisut suleqatigisarnissaat.