Nuuk

Nuuk eqqaamasanut katersugaasivittaarpoq

Ukiorpassuarni Peqatigiiffik Nuummit Eqqaamasat Nuummi Eqqaamasanut Katersugaasiveqalernissaq sulissutigaat. Katersugaasivik maanna maajimi ammassalerpoq

Peqatigiiffik Nuummit Eqqaamasat katersugaasivissaq Nuutoqqami amutsivitoqqami alakkarterpaat

Peqatigiiffik Nuummit Eqqaamasat aamma Kommuneqarfik Sermersuumi kommunalbestyrelsi ukiuni arlalinni Nuummi eqqaamasanut katersugaasiviliornissaq kissaataasa annerpaat ilagisimavaat. Pilersaarutit kissaatillu maanna kiisami piviusunngortinneqarnialerpasipput.

Nuummi Eqqumiitsulianik Saqqummersitsiviup ukiup affaa kingulleq illoqarfimmi eqqaamasanut katersugaasiviliornissaq akissussaaffigaa.

Katersugaasivik Nuutoqqami amutsivittoqqami illutaqassaaq. Tassani init qaammatini kingullerni annertuumik iluarsartuunneqarput.

Oqaluttuarisaanermik ingerlateqqiineq
Katersugaasivissaq Nuutoqaq – Nuummi Katersugaasivimmik taaguuteqassaaq, pilersinneranullu Nuup kulturikkut oqaluttuarisaanerata katersorneqarnissaa siunertaavoq. Tamatuma saniatigut katersugaasivik aamma oqaluttuarisaanermik ingerlateqqiisussaassaaq.

- Nuummi kulturikkut eriagisassat tigussaanngitsunik uummaarissumik ingerlatitseqqiisussamik, katersisussamik toqqorterisussamillu katersugaasivimmik pilersitserusuppugut. Katersugaasiviup katersai, immikkut ittumik saqqummersitsineri aaqqissuussinerilu tunngavigalugit katersugaasiviup Nuup kulturikkut oqaluttuarisaanera siammartissavaa soqutiginninnerulersitsiniassallunilu. Katersugaasivissaq illoqarfiit pingaarnersaata ullumikkut qangalu ineriartorneranik takutitsisuussaaq ilisimaneqarluartoq ataqqinartorlu, Kommuneqarfik Sermersuumi borgmesteri, Asii Chemnitz Narup (IA) oqarpoq.

Maajip naanerani
Maannamut Nuutoqaq – Nuummi Katersugaasivik maajip naanerani ammarneqarsinnaassasoq Kommuneqarfik Sermersuup naatsorsuutigaa.

Atuaruk: Kulturikkut eriagisat Nuummut angerlaanneqartut

Powered by Labrador CMS