Assit takukkit: Angallat takornariartaat minutsit qulit ingerlanerini kivivoq

Umiarsuarmut takornariartaammut ilaasut 23-t aamma angallammi inuttat pingasut angallammit takornariartaammit 'Inuk II'-mit kivilernerani niunissaannut minutsit arlaqanngitsuinnaat periarfissaapput.

Aquttoq Jens Ole Thomassen, angallamminik annaassiartortoq oqaluttuarpoq.

Atuaruk: Angallat takornariartaat 26-inik ilaasulik kivisoq - tamarmik annanneqarput

Ajornartorsiulertoq
'Inuk II' sapaammi unnuakkut umiarsuarmut takornariartaammut L'Australimut ilaasunik Qeqertarsuup Tunuani angallassivoq, angallallu ajornartorsiulermat umiarsuarmit 100 meterinik ungasitsigisumi inissisimapput.

- Angallatit takornarianik angallassisut arlaliuvugut. Uanga ilaasukka nioqqammerlugit aquttumit radiokkut saaffigineqarpunga, taassuma oqaluttuaraa, 'Inuk II' aqunneqarsinnaajunnaarsimasoq, taamaammallu kalinneqarnissamik qinnuiginnippoq, Jens Ole Thomassen, takornariartaammi 'Clane'-mi aquttoq nassuiaavoq.

- Tassanngaanniit 200 meterinik ungasitsigisumiippunga. Kinguninngua apuukkama angallat aqumigut immangaatsiareersimavoq, taanna oqaluttuarpoq.

Naluttoq
- Aquttoq nalulluni annanniutit marluk iluarsiniarlugit assoroortupilussuuvoq, taakku angallatip aquaniipput immamullu pisimallutik. Kisianni nammineerluni anillatsinniarlugit taamaatiinnartariaqarsimavaa. Taakku qujanartumik kinguninngua nammineq iluarsisimapput. Kisianni inunnik ikaassuilluta tassaniilereerpugut uagut, Jens Ole Thomassen oqaluttuarpoq.

Taanna sukkasuumik angallammut kiviartortumut allunaasamik qilersipallappoq. 'Clane'-llu inuttai marluk peqatigalgit takornariat 23-t inuttallu pingasut ikaassorlugit aallartipput.

Mayday
- Aasiaat Radioanut aamma ajunaalernermik kalerrisaarivunga. L'Austral gummibådimik immamiittuuteqareerpoq, taannalu aggerpoq, taakku saniatigut angallatit takornariartaatit marluk aamma piareersimapput, annaassiniaasoq oqaluttuarpoq.

- Inuit Clanemut ilaasut amerlingaarmata ilaat angallatip illuanut pinissaannut uinnginniassagatta qinnuigisariaqarpakka, annaassiniaasoq oqarpoq.

Kipisariaqaraa
Minutsit qulit ingerlareersullu 'Inuk II' annanneqarsinnaajunnaartoq paasinarsivoq.

- Takornarissat ilaasut kingulliit qitertik tikillugu ikaarutinnginneranni immamiilereersimapput. Tuaviortariaqarattalu annaanneqartut kisinngitsoorpagut. Inuk II-mi inuttat ilaata ilaasut tamakkersimanersut qulakkeerniarlugu misissorpaa. Taamaaleriarluta allunaasaq kipivarput, taamaanngippat kiveqataasimassagaluarpugut, Jens Ole Thomassen oqaluttuarpoq.

Utimut angallanneqartut
Gummibådi ikiorsiullugu takornariat L'Australimut ikaarunneqarput.

- Inuttakka qujanartumik peqqissaasunngorniartuupput, annaanneqartullu ikaarunneqannginnerini isumagaat, qipimmik kissasserlugit eqqissisarlugillu, taanna oqaluttuarpoq.

Assit uani allaaserisap ataani takukkit