inissiat
Asii inissiat pillugit: Neriorsuigaangama eqquutsittarpakka
Borgmester Asii Chemnitz Narupip ukiut sisamat matuma siorna Nunatsinni illoqarfiit pingaarnersaata kommuniani 2020-p tungaanut inissiat nutaat 800-t pilersinneqassasut neriorsuutigaa. Maanna ukiut sisamat qaangiutereertullu 51-iinnaat piareersimavai qulakkeerpaali neriorsuutini eqquutsikkumaarlugu.
- Aallartinniarneq arriikkaluartoq anguniagarput angujumaaripput qularinngilara, Asii Chemnitz Narup Sermitsiaq.AG naqissusiivoq, anguniakkallu qanoq aningaasalersorneqassanersoq saqqummiullugu.
2014-miit 2017-mut inissiat 341-t Nuummi sanaartorneqarsimapput. Taakkunanngalu kommune attartornissamik pisititsinissamilluunniit 51-nik isumaqatigiissusiorsimalluni.
2018-mit 2020-mut init 840-t nutaat inigineqalernissaat naatsorsuutigineqarpoq. Taakku kommunip nammineq sanaartunngikkunigit, pisiarisimanngikkunigit inissiat 266-t attartulersimassagai borgmesterip paasissutissiissutigaa kisitsillunilu:
Atuaruk: Borgmesterip inissianut pilersaarutaa oqaluinnarnerusoq
- 2014-mit 2020-mut inissiat 1181-t sanaartorneqarsimassasut naatsorsuutigaarput. Taakkunannga 317-t Kommuneqarfik Sermersuumit atorneqassallutik.
Sanaartornerujussuup aningaasaqarneq pitsanngortissavaa
- Taakku init 1181-t saniatigut Kommuneqarfik Sermersuup Siorarsiorfik piviusunngortissallugu sulissutigaa - suliunitip Nuuk City Developmentip inissiat 1600-t ukiut arfineq-pingasut ingerlanerani siunertaraa. Taakkungannga inissiat 400-t Kommuneqarfik Sermersuup pigissavai, borgmester paasissutissiivoq. Kingullermi qineqqusaarnermi neriorsuutigisimasani piviusunngortinnialikkersaarlugu:
Atuaruk: Nunatta oqaluttuarisaanerani inissianut pilersaarut annerpaaq
- Aap, neriorsuingaagama eqquutsittarpakka. Inissiat 800-t assigiinngitsunik aningaasalersornerisigut 2020-p naalernerani piareerneqassapput.
Unammilligassat arlallit
Innuttaasut annikinnerusunik isertitallit akissaqartitaannik inissialiortitsinissamut kommuni assigiinngitsutigut unammilligassaqarsimammat neriorsuutaasimasup piviusunngortinniarnera ilimagisamit kigaannerusoq Sermitsiaq.AG-mut nassuiaatigaa.
- Naalakkersuisut 2013-mi nikimmata sineriammi sanaartornissaq salliutinneqalerpoq Nuummilu sanaartorneq unikaallalluni. Nuummi sanaartugassat pisariallit aningaasanut inatsimmit peerneqarput tamannalu illoqarfitsinni ingerlaannaq malugaarput. 2015-mi aamma Nuummi inissiat nammineq pigineqartoq ataasinnguarluunniit atorneqanngilaq, Asii Chemnitz Narup paasissutissiivoq.
Naligiisitsiniarneq kommunimut unammillernarsimavoq
- 2014 - 2015-milu nalimmassaanissamik aaqqissuussineq Kommuneqarfik Sermersuumut eqquinerlussimavoq. Namminersorlutimmi Oqartussat Kommuneqarfik Sermersuumit millionilippassuit kommuninut allanut nuunneqassasut aalajangiuppaat. Nalimmassaaniarnermi akiliineroqquneqarnerput kommunip missingersuutaanut killilersuisimavoq. Kommunillumi sanaartornermut aningaasartuutissai ilanngaaffigineqangaatsiarsimallutik, illoqarfiit pingaarnersaanni borgmesteri naqissusiivoq.
Aningaasaliisuusinnaasut
Kommuni aningaasaliisinnaasunik periarfissarsiorluni ulapissimasoq aamma oqaatigaa. Sanaartortoqarujussuarnissaanut aningaasanik attartortarfiit arlallit Nuummut tikeraarsimasut paasissutissiissutigaa. Aningaasanik atorneq inissianik nutaanik sanaartornissamut atugassat.
- Aningaasaliisinnaasunik isumaqatiginninniarnerit aallartereerput, taakku inissianik pisiarineqarsinnaasunik attartugassanilluunniit sanaartortitsinermi aningaasaliissallutik. Periusissiaq ingerlateqqinnissaa siunniuteqqavarput Nuummimi inissaaleqinerujussuaq eqqartugaatigisoq, borgmesteri nassuerpoq. Kommunip Namminersorlutik Oqartussanit ineqarnermut immikkoortortaqarfik tigussallugu sukataarsimasoq aamma oqaatigaa.