inissiat attartortakkat
Borgmesterip inissianut pilersaarutaa oqaluinnarnerusoq
Illoqarfiit pingaarnersaata kommunia ukiumut inissianik 150-inik ineqarnermut akiliummik akileruminartunik sanaartortarnissaa, borgmesterip Asii Chemnitz Narupip 2013-imi naqissuserpaa. Inissiat attartortakkat 2013-imili sanaartormeqarsimanngitsut maanna paasinarsivoq
Kommuninut, nunaqarfinnut, isorliunerusunut aamma ineqarnermut naalakkersuisuusimasup, Martha Lund Olsenip, Inatsisartunut ilaasortamut Jens-Erik Kirkegaardimut akissutaani una takuneqarsinnaavoq:
- Kommuni ukiuni kingullerni sisamani atulersimasunik nammineq sanaartorsimanngilaq. Namminersorlutik Oqartussat Nuummi inissialiornikuunngillat.
Borgmesterip Asii Chemnitz Narupip 2013-imi inissianut pilersaarutini Sermitsiamut saqqummiukkaluarpaa:
- Ukiuni 5-7-ni tulliuttuni ukiumut inissiani 150-inik sanaartortoqartarnissaa pilersaarutaavoq. Inissiallu ineqarnermut akiliutissaat ilaqutariit SIK-p isumaqatigiissutaat naapertorlugit isertitaqartunit akilerneqarsinnaassapput, borgmesteri Sermitsiamut taamani naqissusiivoq.
Ajornartorsiut pingaarutilik
Illoqarfiit pingaarnersaanni ineqarniarnermut ajornartorsiut aaqqiivigineqarnissaa pingaaruteqartoq, taamanikkut oqaatigaa.
- Kisermaanik angerlarsimaffeqanngitsunik peqarpugut, ilaqutariit nammineerlutik angerlarsimaffeqanngitsut, inuusuttullu inersimasutut namminneq inuulernissaminnut periarfissaqanngitsut. Tamatuma qaavatigut inissaaleqinermi inuuniarnermut ajornartorsiuterpassuupput, borgmesteri 2013-imi pilersaarutini nassuiarlugu oqarpoq, nangillunilu:
- Tamatuma saniatigut amerlanerusut Nuummi najugaqalerusuttut naammattoortarpagut, illoqarfiit pingaarneraanni ineriartortitseqataarusuttut.
Inissiat 126-t sanaartorneqalersut
Kommuni maannakkorpiaq Tuujuk/Lille Slettemi inissat 126-t sanaartorai Qinngorpumilu inuusuttut inissaat 23-t sanaartorai, akissummi Jens-Erik Kirkegaard ilisimatitsiffigineqarpoq, kisianni taakku suli piareerneqanngillat.
Atuaruk: Inissianut inissaqalersitsiniarluni Qasigiannguit iluarsaanneqassaaq
Kommuneqarfik Sermersooq aqagu marlunngornermi tusagassiortunik katersortitsinissamut aggersaavoq, tassani ''Nuummi illoqarfiup annertuumik ineriartornissaanut'' suliniut saqqummiutissavaa. Pilersaarut inissianik 1600-nik nutaanik ilaqarnerarneqarpoq.
Inissianik suliniut alla - Akornanni - inissianik 90-nik imaqartoq, Sermitsiaq.AG-mit ullumi saqqummiunneqarpoq. Inissianik assigiinngitsunik taanna sanaartortitsineruvoq, tassa attartortakkat, piginneqatigiilluni inissiat aamma illut nammineq pigisat.