Alluitsup Paa
Ajornartorsiortut qeqertamit annaanneqartut
Inuusuttunik pingasunik imaatigut ujaasineq qeqertami nassaarineqarmata qujanartumik iluatsippoq
Kujataani politiit ataasinngornermi aggustip arfineq-pingajuanni nalunaaqutaq 14.30 missaani Aasiaat Radioatigut, angallat pingasunik inuttaqartoq Sermersuup nalaani, Alluitsup Paap kujataani ajornartorsiortoq nalunaarfigineqarput.
Tamatuma kingorna politiit angallatinik Alluitsup Paanit aamma Nanortalimmit sumiiffiup tungaanut aallartitsigamik ujaasineq aallartippaat.
Qeqertamukartut
Angallat aamma nammineq pigineqartoq ikiuuppoq. Sila anorlermat malleqaaq.
Akunnerit arlalialuit ujaasisoqareersorlu taakku pingasut maqaasineqartut qeqertami qimarngusut nassaarineqartut, Kujataani politikommissæriugallartoq, Sivalerak Terkilsen oqaluttuarpoq.
Taakku tamarmik ajunngillat.
Assit takukkit: Angallat takornariartaat minutsit qulit ingerlanerini kivivoq
Taakku ajornartorsiortut pingasut nassuiaapput, Alluitsup Paanit aallarsimallutik silarlugussaasimallutik, taamaattoqarneranillu nalinginnaasumit orsussamik annertunerusumik atuisimallutik.
Sila allanngoriasaartoq
Silassaq naapertorlugu angalanissamut ajorsimanngitsoq taakku sioqqullugu takusimavaat, kisianni Sermersuup tungaani sila allanngorpoq anorlilerluni mallilerlunilu, taakkulu kingorna Aasiaat Radio attaveqarfigaat.
Qujanartumillu kingorna ujaasinermi ajunngitsut nassaarineqarput.
Atuaruk: Ujaasinermi 100.000 koruuninik suli akissarsiassaqartoq