Qeqertarsuaq
Aalisakkat saattuallu 14,5 tonsit Qeqertarsuarmi igittariaqarsimapput
Qerinasuartitsiviup sigginnerata kingunerisaanik ammoniakimik aniasoornermi Royal Greenlandip annaasaqaatit naatsorsoqqammerpaat
Qeqertarsuarmi Royal Greenlandip tunisassiorfiani juullinngitsiartoq qerinasuartitsiviup sigginneratigut ammoniakimik aniasoortoqarnerata kingunerisaanik nioqqutissianik ineriikkanik 14,5 tonsinik igitseqqitariaqarsimapput.
Siullermik tonsit qulit
Royal Greenlandip siullermik nioqqutissat ineriikkat 10,1 tonsit igiinnartariaqarsimavaat, kisianni qerititsiviup misissorneqaqqinnerani saattuat 4,4 tonsit aamma kasiilerneqartariaqarsimapput, royalgreenland.gl taama ilisimatitsivoq.
Nioqqutissat misissorneqartut
- Nioqqutissiat ineriikkat ajutoorfimmiit ungasinnerusumi inissinneqarnikuusut misissorpavut. Paasivarput saattuat tassani inissinneqarnikuusut ammoniakimik aniasoornermit ajoquserneqarsimasut aalisakkalli ajoquserneqarsimanngitsut, Qeqertarsuarmi Royal Greenlandip tunisassiorfiani tunisassiornermi ingerlatsisoq Karl Julius Broberg, royalgreenland.gl-imut oqarpoq.
Suliarineqartoq
Qerinasuartitsiviup sigginneratigut ammoniakimik aniasoornerup kingorna aserortoq suliarineqareerpoq aamma qerinasuartitsiviup atornerani suleriaatsit allanngortinneqarput.
Saattuat kasiilikkat suli tunisassiorfimmi qerinasuartitsivimmiipput, kisiannili siuliini iginneqartut assigalugit asorterneqarlutik iginneqassapput.
Aamma atuaruk: Ammoniakimik aniasoorneq nioqqutissanik 10 tonsinik eqqaanermik kinguneqarpoq