Ammoniakimik aniasoorneq nioqqutissanik 10 tonsinik eqqaanermik kinguneqarpoq

Royal Greenlandip Qeqertarsuarmi tunisassiorfia sisamanngormat ajutoornermik eqqugaavoq, tassani qerititsiviup pladefryserip sigginneratigut ammoniaki annerusoq aniavoq.

Tamanna suliffeqarfissuup saattuat aamma aalisakkat 10 tonsit igittariaqarneranik kinguneqartitsivoq. Royal Greenland.gl taama ilisimatitsivoq.

Sukkasuumik unitsinneqartoq
Suliffeqarfissuaq naapertorlugu aniasoorneq unnuk taanna unitsinneqarpoq. Maannamulli nioqqutissanik naammaseriikkanik qanoq annertutigisunik igitsisoqaqqittariaqarumaarneroq suli ilisimaneqanngilaq.

- Aalisakkanik qerititerutip pladefryserip sigginneratigut ammoniakimik aniasoorneq sisamanngormat ualikkut pivoq. Saarullinnik, qaleralinnik, qeeqqanik aammalu saattuanik nioqqutissianik naammasseriikkanik maannamut tonsinik qulit sinnerlugit igitsereerpugut, Qeqertarsuarmi Royal Greenlandip tunisassiorfiani tunisinermi tunisassiornermilu ingerlatsisoq Karl Julius Broberg oqarpoq.

Ammoniak toqunartuuvoq aammalu neriuisarlunilu, taanna pladefryserini nillusaatitut atorneqartarpoq.

Qatserisartunit atortut
Ualikkut nalunaaqutaq 16:45 missaani ammoniakkimik aniasoorneq pimmat aalisakkanik tunisassiorfimmi sulisut pingasut erngertumik aalisakkerivimmi ajutoorfimmiit anipput.

Tunisassiorfimmilu aqutsisut mekanikerinik ilimasasalinnik aaammalu ajutoornerni taamaattuni sulisinnaanermut akuersissuteqartunik ikiortissarsiorput.

- Aniasoorneq annertuujusoq paasigatsigu qatserisartut atortorissaarutaannik attartorluta mekanikerit tunisassiorfimmi ajutoorfiusumut iserlutik pladefryserip siggiffia iluarsaappaat. Aniasoorneq sisamanngornermi unnukkut unitsinneqarpoq, kisiannili ajutoorfiusoq tamaarmi salinneqareerlunilu silaannarissarneqareermat tallimanngormat ajutoorfiusumi sivikitsuinnarmik isersimasoqarsinnaammat tunisassiorneq aatsaat ataasinngornermi aallarteqqippoq, Karl Julius Broberg oqarpoq.

Aallarteqqittoq
Pladefryseri milinneqarnerata kingorna tunisassiorneq aallarteqqippoq.

Taassuma saniatigut suliffissuup iginneqartussat suli ilisimanngilai. Nioqqutissiat naammasseriikkat ajutoorfiup ungasinngisaani quersuarmi qerinasuartitsivimmiittut maannaiginneqareerput, nioqqutissialli naammasseriikkat quersuarmi qerinasuartitsivimmi allamiittut qanoq annertutigisumik ajoquserneqarsimanersut suli paasineqanngilaq.

Saattuat 1,7 tonsit annertussusillit maanna aserorterneqarlutik iginneqareerput aalisakkalli kasiilikkat iginneqarnissaasa tungaanut isumannaatsumi immikoortillugit inissinneqarput.

Atuaruk: Aasianni kilisaammi usingiaasoqarnerani ajutoortoqartoq