Aaja: - Immap assingi pillugit isumaqatigiissut angusaqarluarnianngitsoq

Immap assingi digitaliusut qaqugu piariissanersut nutaamik piffissalerneqanngillat. Piffissaliisoqarnissaanut ukioq ataaseq affaalu qaangiuppat aatsaat piffissamut pilersaarummik peqalissaaq.

Tamannalu IA-mi Folketingimut ilaasortap, Aaja Chemnitz Larsenip naammaginngilluinnarpaa.

- Assit qaqugu piariissanersut aalajangersimasumik piffissamik pilersaarusiortoqarsimanngimmat uggoraara, taanna Sermitsiaq.AG-mut oqarpoq.

Atuaruk: Immap assinginut isumaqatigiissut nutaaq - piffissaligaanngitsorli

- Naalakkersuisut angusaqarluarnianngitsut
Sulineq maanna uninngavoq. 2015-ip tungaanut assit 32-t sanaartorneqarput. Taamanili suli ataatsimik sanasoqaqqinngilaq.

Attaveqaqatigiinnermut naalakkersuisoq, Erik Jensen (S) aamma danskit pilersuinermut silallu pissusianut ministeriata Lars Christian Lilleholtip (V), immap assingi 2018-imi piareersimasussaagaluit pillugit nutaamik isumaqatigiissusiorput. Kisianni isumaqatigiissut sanaartorneqarnissaasa salliutinneqarnissaannut tunngassuteqaannarpoq.

Atuaruk: Immap assinganik suliaqarneq tupannartoq

- Soorunami erseqqissaasoqarnera ajunngilaq, kisianni Naalakkersuisut kalaallit innuttaasut sinnerlugit angusaqarluarniannginnerat uggornartoq isumaqarpunga.

- Imaatigummi isumannaallisaaneq pingaaruteqartuaannarpoq, Aaja Chemnitz Larsen (IA) oqarpoq.

Isumasioqatigiinneq
Taanna immap assinginut piffissamut pilersaarummik angusaqarluarniartumik piviusorsiortumillu ujartuivoq. Maanna isumaqatigiissuteqartoqarmat suliaq unitsiinnarnianngilaa. pilersuinermut silallu pissusianut ministeri Lars Christian Lilleholt (V) Nunarput pillugu ataatsimiititaliamut isumasioqatigiinnissamut qaaqquneqareerpoq.

- Tassani piffissaliussamut pilersaarummut tunngasumik apeqquteqarniarpunga, Aaja Chemnitz Larsen (IA) oqarpoq.