ujaasineq
18-inik ukiulik Qeqertarsuarmi suli ujarneqarpoq
Qeqertarsuarmi politiit 18-inik ukiulik Palu Broberg, kingullermik sisamanngornermi decembarip 4-aanni takuneqarsimasoq, suli ujaaraat
18-inik ukiulik Palu Broberg, sisamanngornermi decembarip sisamaanni nalunaaqutaq 19.20 missaani Qeqertarsuarmi Qaqqannguup Aqqutaani angerlarsimaffimminit anisoq, kingorna takuneqarsimanngilaq.
Taamaattumik Qeqertarsuarmi politiit arfininngormat ujaarilerpaat, Palu Brobergillu sisamanngornermiilli angalaarsimaneranik paasissutissanik innuttaasunut ikioqqullutik.
Atuaruk: Ujaasineq: Angut 18-nik ukioqartoq tammaaneqarpoq
Qaasuitsup Politiivisa marlunngornermi ilisimatitsissutigaat Palu Broberg pillugu paasissutissanik pissarsisimanatik, taamaattumillu ujaasineq attatiinnarneqartoq
Politiit paasissutissiinerat malillugu Palu Broberg 180 centimeterinik angissuseqarpoq qernertumik tuluujuaraqarluni, taartunik qarleqarluni aappalaartumillu Nike-nik skooqarluni, angerlarsimaffimminiillu anigami qaatigooqarsimanngilaq mobileqarsimananilu.
Qeqertarsuarmi innuttaasut qinnuigineqarput pequusiviit, kiilerit assigisaalluunniit misissoqqullugit.