politiit
Ujaasineq: Angut 18-nik ukioqartoq tammaaneqarpoq
Qeqertarsuarmi politiit 18-inik ukiulik Palu Broberg, kingullermik sisamanngornermi decembarip 4-aanni takuneqarsimasoq, ujaaraat
18-inik ukiulik Palu Broberg, sisamanngornermi decembarip sisamaanni nal. 19.20 missaani Qeqertarsuarmi Qaqqannguup Aqqutaani angerlarsimaffimminit anisoq, kingorna takuneqarsimanngilaq. Taamaattumik Qeqertarsuarmi politiit arfininngormat ujaarilerpaat, Palu Brobergillu sisamanngornermiilli angalaarsimaneranik paasissutissanik innuttaasunut ikioqqupput.
Politiit ullumi sapaammi oqarput Palu Broberg pillugu paasissutissanik pissarsisimanatik, taamaattumillu ujaasineq attatiinnarneqartoq.
Politiit paasissutissiinerat malilugu Palu Broberg 180 centimeterinik angissuseqarpoq qernertumik tuluujuaraqarluni, taartunik qarleqarluni aappalaartumillu Nike-nik skooqarluni, angerlarsimaffimminnillu anigami qaatigooqarsimanngilaq mobileqarsimananilu.
Qeqertarsuarmi innuttaasut qinnuigineqarput pequusiviit, kiilerit assigisaalluunniit misissoqqullugit, taamatut ujaasisinermi allappoq politiassistent Taitsiaq Heilmann.
Politiit Palu Broberg qinnuiagaat sukkanerpaamik ilaquttani politiilluunniit attavigeqqullugit, inuillu Palu Brobergip sumiinneranik ilisimasallit, imaluunniit sisamanngormat angerlarsimaffimminit aninerata kingor takunnissimasinnaasut, qinnuigaat Qeqertarsuarmi Politiinut telefon 70 14 25-mut naliginnaasumik suliffiup nalaani saaffiginneqqullugit, imaluunniit suliffiup avataani Nuummi pigaartumut telefon 70 14 18-mut saaffiginneqqullugit.