aqqusinniornissaq
150 kilometerinik isorartutigisumik aqqusinniornissamik sinnattoq aallartisarneqalertoq
Qeqqata Kommuniani sinniissut Malik Berthelsen siuttoralugu pingasunngorpat Nuummukassapput, tassani Naalakkersuisut kommunip Sisimiuniik Kangerlussuarmut aqqusinniortitsinissaanut aningaasaleeqataanissaat anguniarneqassalluni.
Malik Berthelsen ulluni 16-ni borgmesteriusimalerpoq, aqqusinniortitsinissarsuarli illoqarfiit pingaarnersaannit qanoq tiguneqarnissaa, pissagassutigalugu nassuerutigaa.
Ukiuni arlalinni eqqartorneqarsimasoq
Ukiut 15-nit sinnerlugit Kangerlussuarmut aqqusinniortitsinissaq qanoq akeqarnissaa sunillu piumasaqaatitaqarnersut, oqallisigineqartarlunilu arlalinnik misissuiffigineqartarsimavoq – piffik UNESCO-p allatoorsimaffiannut ilanngunneqarsimasoq.
Massakkut pissasoq
Kommunip allaffeqarfia tunngavilersuutinik saqqummiussinermilu atugassanik Nuummut angalanissaq pitinnagu ulapissimapput, ilaatigut aningaasaliissutissat ilaat akuersissutigineqarsimallutik. Borgmesterip kommunaldirekøri Paneeraq Olseni, vicekommunaldirektøri Laust Løgstrupi kiisalu aallarnisaasoq Larseeraq Skifte angalaqatigissavai.
Atuaruk: UNESCO-mut qinnuteqaatissaq alla piareersarneqarpoq
Katataassaagut
- Nuummi Ilulissanilu mittarfiit suliniutigineqarput takornariaqarnermut taakkununnga iluaqusiisussaq. Uagut iliuuseqanngikkutta katataassaagut, Nuummut aallanngilaattaa, Malik Berthelsen Sermitsiaq.AG-mut oqarpoq.
- Kommunalbestyrelsimi anguniangaraarput takornarialerineq pingaarnertut aningaasaliiffigineqartunut ilaassasoq. Massakkut saarulliit aningaasanik isaatitsillutigilluarpavut. Isaatitsinerli siunissamut qularnaveeqqusiisinnaanngilaq, Malik Berthelsen paasissutissiivoq.
Taanna nunap assingata saani issiavoq, illoqarfiit marluk akornanni aningaasaliiffigineqarsinnaasut arlallit tassani takuneqarsinnaallutik.
Atuaruk: ATV-nut aqqut iluaqutaalluarsinnaavoq
Sisorartitsisarneq
Sermip Qaqqutikitsup eqqaani islandimiut takornarialerinermik suliaqartut akunnittarfiliorniartut nalunaarutigineqarsimavoq.
Aap, tamanna sisorartarfiliarineqassaaq, aqqusinniornikkulli tikikkuminartunngussaaq, taamaasillunilu qulimiguulinnik angalanerit akisoqisut sipaaruteqarfigineqarsinnaalissallutik.
Aqqusinissami 150 kilometerinik isorartussusillip aqqutaani Kangerlussuullu tungaanut pinngortitami kusanarluinnartumi unnuisarfinnik arlalinnik pilersitsiortortoqalissaaq. Ullummikkut upernaakkut, aasaakkut, ukiakkullu pisuffigineqartarnera alutorineqarluartuuvoq, ukiukkulli takornariat qimusserlutik tamanna aqqutigissallugu nuannarisaqaat.
Atuaruk: Qeqqata Kommunia takornariaqarfinngussaaq
Akia: 350-400 mio. koruunit
Aqqusinniornissaq 350 aamma 400 mio. koruunit missaannik akeqassasoq, Malik Berthelsenip paasissutissiaraa. Taassumali neriuutigaa Naalakkersuisut suliniutip affaanut aningaasaliisinnaassasut. Aningaasaliititsinissaq iluatsissappat, kommuni ukiumut 15 mio koruuninik ukiuni tulliuttuni 30-ni akiliisinnaalluni piareersimavoq.
- Neriuutigisimangaluarpara, suliniut pingasunngorpat Kim Kielsenimut, Aqqaluaq B. Egedemut, Hans Enoksenimut aammalu Erik Jensenimut saqqummiussinnaassallutigit. Ataatsimoortinniarneralli ajornarsimavoq, taamaammat oqaloqatiginninnerit Hans Enoksenimut Erik Jensinimulli pingasunngorpat aallartissavagut, Sisimiuni Siumup borgmesteriutitaa 38-nik ukiulik nassuiaavoq.