Arnaq toqutseriarsimasutut pinngitsuutinneqarpoq
Arnaq 33-nik ukiulik toqutseriarsimasutut Sermersuup Eqqartuussiviani pinngitsuutinneqarpoq, nakuusersimasutulli pineqaatissinneqarpoq.
Arnaq 33-nik ukiulik Sermersuup Eqqartuussiviani ilaatigut toqutseriarsimasutut pinngitsuutinneqarpoq. Arnaq persuttaasimasutut eqqartuussinermi pineqaatissinneqarpoq, ukiorlu ataaseq nakkutigineqartussatut pineqaatissinneqarluni.
Oktobarimi 2019-imi oktobarimi Tasiilami pisimasut arlallit tunngavigalugit arnaq suliami unnerluutigineqarpoq.
Unnerluutigineqartut ilaat tassaapput nakuusernermik pissusilersorneq, nakuusernerit marluk toqutseriarnerlu.
Unnerluussut naapertorlugu pisimasoq kingulleq taanna 2019-imi septembarip qulingani pisimavoq.
Eqqartuussivimmut suliassanngortitsinissaq eqqarsaatigigaa
Nunatta Eqqartuussivianut suliaq suliareqqitassanngortissanerlugu ullut 14-it eqqarsaatiginnikkumallutik, unnerluussisussaatitaasut nalunaarput.
- Unnerluutigineqartup toqutseriarsimasutut pineqaatissinneqarnissaanut uppernarsaatissaaleqisoqartoq eqqartuussiviup nalilerpaa, taamaallaat pinerluttulerinermi inatsimmi § 88 naapertorlugu sakkortuumik nakuusersimasutut pineqaatissinneqarnissaanik uppernarsaatissaqarmat. Maanna eqqartuussut allakkatigut misissornissaanut periarfissaqaqqaartariaqarpugut, tamatumalu kingorna ullut 14-it ingerlaneranni eqqartuussut Nunatta Eqqartuussivianut suliareqqitassanngortinneqassanersoq, imaluunniit naammassineqassanersoq unnerluussisussaatitaasut aalajangersinnaapput, Kalaallit Nunaanni Politiit unnerluussisussaatitaasut sinnerlugit taama oqarput.