Arnaq toqutseriarsimasutut eqqartuunneqassasoq
Arnaq 33-nik ukiulik 2019-imi toqutseriarsimasutut unnerluutigineqartoq Tasiilami sapaatip-akunnerata tulliani eqqartuussivimmi sassartinneqassaaq.
Annonse
Toqutseriartoqarneranit ukiut sisamat sinnerlugit qaangiuttut pisoq Sermersuup Eqqartuussiviani ataasinngornermi suliarineqassaaq.
Arnaq 33-nik ukiulik 2019-imi oktobarimi Tasiilami pisimasut arlallit pissutigalugit suliami unnerluutigineqarpoq.
Arnaq pisimasuni sisamani unnerluutigineqarpoq. Imerniartarfiup Krostuenip silataani septembarip qulingani sakkortusaartumik pissusilersorsimanermigut ilaatigut eqqartuunneqassalluni.
Arnaq inullu alla imminnut saassussimapput aappaalu kiinnamigut qitsuarneqarluni inussamigut kiineqarpoq. Kinguninngua arnap angut uppisippaa arlaleriarlunilu tukkarlugu. Taamaaliornerata kingunerisaanik persuttaasimasutut unnerluutigineqarpoq.
Arlaleriarluni suliarineqarniaraluartoq
Arnaq septembarip aallaqqaataani 2019-imi nakuusersimasutut toqutseriarsimasutullu aamma unnerluutigineqarpoq. Tasiilami najugaqarfiit ilaanni inuk savimmik kapisimagaa arlalinnik ikilerlugu puaalu pullaarlugu.
Suliap eqqartuussivimmi arlaleriarluni suliariniarneqartarsimanera sivisuallaarneranut pissutaasoq Kalaallit Nunaanni Politiit ilisimatitsipput:
- Timmisartumik angalanissat taamaatiinnarneqarnerat aamma unnerluutigineqartup inuttut atugaat ilaatigut pissutigalugit kinguartinneqartarsimavoq.
- Suliaq kingullermik apriilimi 2022-mi eqqartuussivimmi suliarineqarpoq. Tassani aalajangerneqarpoq unnerluutigineqartoq eqqarsartaatsikkut misissorneqassasoq, tamatumalu kingorna suliaq suliarineqaqqinnissaanut kinguartinneqarpoq, Kalaallit Nunaanni Politiit Sermitsiap nittartagaanut ilisimatitsipput.
