INATSISARTUT ALLATTOQARFIAT
Ajornartorsiutit aaqqinniarlugit iliuuseqapallattoqartariaqarpoq
Sulinermi avatangiisit pillugit ajornartorsiutit aaqqinneqarnissaat pisariaqarluinnartoq sulisut kattuffiata Djøfip allakkatigut Inatsisartullu Allattoqarfiata aqutsisuinik ataatsimeeqateqaqattaarnermigut erseqqissarsimavaa.
Annonse
Inuiaqatigiilerinermi aningaasaqarniarnermilu ilisimatuut ilinniartullu kattuffiat Djøf pisortani sulisut pisortallu amerlanersaasa ilaasortaaffigaat. Kattuffiup Inatsisartut Allattoqarfianni ajornartorsiutip annertuup piunera eqqumaffigaa:
- Inatsisartut Allattoqarfianni sulinermi avatangiisit ajornartorsiutaangaatsiartut Sermitsiami allaaserisat takutippaat, Djøf Offentligimi siulittaasoq aamma Djøf-ip Kalaallit Nunaanni ilaasortaanut sinniisuusoq Johanne Nordmann oqarpoq.
- Djøf-ip aggustimi 2023-mi allakkatigut saaffigineqarnermini, Inatsisartut Allattoqarfiata aqutsisuinik
tamatuma kingorna ataatsimeeqateqarnermini ajornartorsiutit aaqqinneqarnissaat nukinginnartoq erseqqissarpaa.
- Suliffimmi avatangiisit pitsaasut, timikkut tarnikkullu, qulakkeernissaat pisortat pisussaaffigaat, Johanne Nordmann oqarpoq.
Inatsisartut siulittaasuat Mimi Karlsen kukkusumik paasissutissinneqarsimava?
Inatsisartut siulittaasuata Mimi Karlsenip apeqqutigigaa Inatsisartut allaffianni sulinermi avatangiisit ilumut taama ajornartorsiutaatigineranni sulisut kattuffii sumiinnerannik apeqquteqarnera Djøfip tupigusuutigaa:
- Mimi Karlsenip kattuffittut qisuariarnata ajornartorsiutit Inatsisartut allattoqarfiannut qaqissimanngikkivut isumaqarnera tupigusuutigaarput. Piviusunut naapertuutinngilaq, Johanne Nordmann oqarpoq.
Atorfeqarsimanerup sivisussusia appariapiloortoq
Sulisimasunit arlalinnit suliffimmi avatangiisit ajorluinnartut pillugit oqaluttuat Sermitsiap tusarfigai. Oqaloqatigisavut tamarmik sulisuupput tulluusimaartut suliaminnik pitsaassutsimik pitsanngorsaasimasut. Tamarmillu ukiorpassuarni atorfeqarsimallutik. Taakku suliffimminniiginnarusullutik aqutsisunit soraarsitaasimanerat tamarmik aqqusaarsimavaat.
- Allattoqarfimmi sulisut taarseraattorujussuunerat takusinnaavarput. Ukiullu kingulliit marluk ingerlaneranni agguaqatigiissillugu atorfinitsitaasimasut sivisussusiat appariarujussuarsimavoq.
- Ilisimasat, paasisimasat misilittakkallu annaaneqarnerannik kinguneqarpoq. Tamannalu allaffeqarfiup Kalaallit Nunaanni politikerinut qinikkanut siunnersuinerata ikiuineratalu pitsaassusianut sunniuteqarpoq.
- Iliuuseqarneq allaffeqarfimmi pitsaasumik sulisoqarnissaanut qulakkeerinninneruinnarani Kalaallit Nunaanni tamat oqartussaaqataanerat tunngavigalugu ingerlatsinermut illersorneqarsinnaasumik qulakkeerinninneruvoq. Eqqissiviilliornerit innuttaasut Namminersorlutik Oqartussanik tatiginninnerannut ajortumik sunniuteqarput, tamannalu kikkunnulluunniit iluaqutaasinnaanngilaq, Johanne Nordmann naggasiivoq.
