INATSISARTUT ALLATTOQARFIAT
Soraarsitsinerit inatsisinik tunngaveqanngitsut sulisunillu tarnikkut erloqisitsinerit
Inatsisartut allattoqarfianni siusinnerusukkut sulisimasut pingasut oqaluttuarput suliffiup avatangiisai ajorluinnartut, taakkua naapertorlugit sulisut amerlasuut stressimik napparsimalerlutik sulinngiffeqartariaqartarsimapput aamma sulisut amerlasuut soraarsimapput. Maanna sulisimasut allat ilaliillutik oqaluttuarput suliffimmi atugassarititaasut ajorluinnartut pillugit.
Annonse
Nunatsinni inatsisiliortut inatsisartut pitsaanerpaamik kiffartuunneqartussaapput, inatsisit innuttaasunut atuuttussat kukkusumik suliarineqannginniassammata.
Kingullertigut takuarput, utoqqalinersiaqalersinnaassagaanni pilersuisussaaqatigiinnermik pisussaaffiup peerneqarnera, inatsisip aalajangiunneqareernerata kingorna naleqqussarneqarnissaa pisariaqalersimasoq.
Pinngitsoorneqarsinnaagaluarpa, Inatsisartuni ataatsimiititaliat Naalakkersuisut siunnersuutaannut eqqummaarinnerusimasuuppata?
Aap! Taamak isumaqarpoq siornatigut ataatsimiititaliami allattaasimasoq, taanna aamma ukiuni arlalinni Inatsisartut allattoqarfiani sulisimavoq. Taannalu sulisuusimasut pingasut oqaluttuarisaannut tamakkiisumik tapersiivoq, taakku Inatsisartut allattoqarfianni suliffimmi avatangiisit ajorluinnartut pillugit oqaluttuaannut:
- Uanga tamakkiisumik tapersersuisinnaavunga taakkua allaaserisap saqqummiussaatut oqaluttuarnerannut. Oqaluttuarnerat naapertorlugu allaaserineqartoq ilumoorluinnarpoq. Aqutsisut soqutigisaqanngillat suliat pitsaassusaasa qaffasissuunissaannut, akerlianilli peqqissaartumik suliaqaraluaraangatta sakkortuumik isornartorsiorneqarsinnaasarpugut, piffissaliussap sivikitsuaqqap iluani suliat peqqissaartumik naammassiniarlugit qaangiuttoortariaqarsimagaangatta. Pingaartumik Inatsisartunut isumaliutissiissusiat piffissamik killiliilluni naammassineqareersussat tunniunneqareersussallu eqqarsaatigalugit, Sermitsiap nittartakkatigut nutaarsiassaqartitsivianut taamak oqaluttuarpoq tusarfipput kinaassutsiminik isertuussisariaqartutut misigisimasoq malersorneqalernissani aarleqqutigalugu.
Annaasaqartut tassaapput politikerit
- Ullumikkut isumaliutissiissutaasartut allattoqarfiup saqqummiuttagai atuaraangakkit, takusinnaavara Allattoqarfik suliat pitsaassusissaasa tungaatigut toqusimasoq. Allattoqarfimmi siusinnerusukkut suliat pitsaassusissaannik pingaartitsiffiusoq, suliat naammassineqarnissaannut isumassarsiullaqqiffiusoq immikkuullarissumillu aaqqiissutissarsiorsinnaassusilik siusinnerusukkut Allattoqarfiup ilisarnaatiginikuuaa, maannali tamanna annaaneqarnikuuvoq. Tamatumunnga pissutaapput aqutsisutut naammaginartumik piginnaasaqanngitsut, oqarluaannarlangalu, akulikitsumik sulisuminnut ajortuliorfiginnittartut assullu kussissuusut.
- Imaassinnaavoq Mimi Karlsen-ip suliaq suliarinagu peersissinnaagaa, taamaaliussagunili sulisuinnaat eqqorneqaatigisassaannik, taakkumi aarlerinartorsiorput qunusiarisatut, tarnikkut persuttagaasutut annilaangatitaasutullu suliniarsarinissartik, pingaartumik suliassat piffissami aalajangersimasumi killilikkat naammassiniarsarineranni.
- Politikerit tassaapput ajorsartinneqartut, taakkumi sulisuminnit pitsaasumik kiffartuunneqarsinnaanngillat, piumasaqaataasut naammassisiniarnissaannut sakkussaaleqineq pillugu. Allaaserisami oqaatigineqarpoq ukiut 50-it Allattoqarfiup oqaluttuarisaanera annaaneqarsimasoq. Tamanna ilumoorpoq, sulisut misilittagaqartut ingerlaavartumik nakkarsarneqarnermikkut qimagussornerat takussutissiivoq.
Pissutissaqanngitsumik soraarsitsineq
Sulisuusimasoq alla oqaluttuarpoq pissutissaqanngitsumik soraarsitsisoqartarneranik aamma oqaluttuarpoq, soraarsitsinermi sulisup kattuffia akuliunniarsarisimagaluarluni aqutsisut ajugaasutut inississimapput:
- Tamanna ilumoorpoq, Allattoqarfik uggornartumik suliffittut peqqinnanngilluinnartutut ineriartorsimavoq. Aqutsisut sutigut tamatigut nakkutilliisutut imminnut inissittarnerat tupinnaannartumik annertoorujussuuvoq, allaat sulisuusut akunnerminni suleqatigiittarnerat nakkutigeqqissaarneqartarput.
- Naapertuilluartumik ingerlasoqarnissaanik uanga pingaartitsisuuvunga, taamaammallu naapertuilluanngitsumik pisoqaraangat nipangersimaannarneq ajorpunga, tamannali ajoraluartumik suliffinnik annaasaqarninnik kinguneqarpoq. Pisumut kattuffiga akuliukkaluarpoq ikiorniarlunga pissusissamisuunngitsumik soraarsinniarneqarama. Kisianni aqutsisut putoqquffigineqarsinnaanngillat pallittaalisaqaramik, kattuffimmalu ikiuunneratigut ilungersoraluarnerma inernerivaa ukiup affaa akissarsiaqarlunga suliffinnit soraarsitaanera. Tassa ilaatigut taamatut sulisut nipangersimaannanngitsut akisinnaassuseqartullu suliffimmit piiarneqartarput.
Sermitsiap nutaarsiassaqartitsivianit sulissutigaarput pisortani atorfillit kattuffiat DJØF oqaaseqartinniarlugu, taanna atorfeqarsimasut kattuffigivaat.
