USA-p ”Nunataminik annertusaanissamik” soqutigaa
Kalaallilluunniit Nunaannik pisiumanini pillugu præsidenti Donald Trump suli
pisortatigoortumik saaffiginissuteqanngilaq.
-Oqallinneq qiviassagutsigu, Donald Trumpillu
tusagassiortunit apersorneqarnermini akissutigisai qiviassagutsigit, taava
oqaatigisimasani aalajangiusimavai.
USA-p ”Nunataminik annertusaanissamik” soqutigaa
Kalaallilluunniit Nunaannik pisiumanini pillugu præsidenti Donald Trump suli
pisortatigoortumik saaffiginissuteqanngilaq.
-Oqallinneq qiviassagutsigu, Donald Trumpillu
tusagassiortunit apersorneqarnermini akissutigisai qiviassagutsigit, taava
oqaatigisimasani aalajangiusimavai.
- Kalaallilli Nunaannut suli
pisortatigoortumik saaffiginnittoqanngilaq, taamaammallu qanorluunniit pisoqaraluarnerani
Kalaallit Nunaat tuniniagaanngilaq, inuiaallu kalaallit Kalaallit Nunaata siunissaa aalajagingassaraat,
Naalakkersuisut Siulittaasuat Múte Bourup Egede (IA) oqarpoq.
Aqqutit assigiinngitsut aqqutigalugit Naalakkersuisut
USA-mik Danmarkimillu oqaloqateqartut, oqaloqatigiinnernilu Namminersorluni
Oqartussaaneq pillugu inatsit akisussaaffiillu agguataarneqarnerat
aallaaviusoq, Naalakkersuisullu Itillermi oqariartuut tunngavigalugu Kalaallit
Nunaa pineqartillugu nunanut allanut tunngasunik politikikkut ataatsimiinnerni
akuutinneqartarnerat, taassuma nassuiaatigaa.
Naalakkersuisut nunatta soqutigisaata nunanut allanut suliassaraat, kalaallillu innuttaasut Kalaallit Nunaata siunissaanik nammineerlutik aalajangiisussaanerat tamatumani oqariartuutaavoq pingaarutilik. Tamanna ilaatigut Kalaallit Nunaata Amerikami politikerinut soqutigisaqartunullu oqariartuutaanik USA-mi sinniisoqarfiup sulineratigut pivoq.
- Naalakkersuisut Siulittaasut, Múte Bourup Egede.
- Sinniisoqarfipput piffissami matumani
ulapittorujussuuvoq, nunattalu siunissaata nunap innuttaanik
aalajangerneqartussaanera, isumannaallisaanittalu USA-p illersorneqarnera
Nunatta illersornerigaa oqariartuummik suliakkerneqarpoq, Múte Bourup Egede
oqarpoq.
Naalagaaffinngornissamut Nunanullu allanut
Naalakkersuisoq Vivian Motzfeldt (S), illersornissaq pillugu
isumaqatiginninniarnerni peqataaqqammertoq, qallunaat nunanut allanut
ministerianik Lars Løkke Rasmussenimik (M) issiaqateqaqqammivoq, taassumalu
USA-p nunanut allanut ministerianik Mark Rubiomik tallimanngornermi
oqarasuaatikkut ataatsimeeqateqarnerani naalaaqataalluni.
- Nunanut allanut Naalakkersuisup danskit nunanut allanut
naalakkersuisualu USA-mi nunanut allanut naalakkersuisorlu ataatsimiimmata tusarnaaqataavoq, nunarput pineqassappat
avaqqunneqartussaannginnerput pillugu, Múte Bourup Egede
oqarpoq.
Taassuma Issittumi isumannaallisaaneq oqaluuserisanut
ilaannginnera nassuiaatigaa. Issittumi isumannaallisaanerup USA-p, Danmarkip
Kalaallillu Nunaata akornanni kingusinnerusukkut oqaluuserinissaa
isumaqatigiissutigineqartoq, DR-mi nutaarsiassani atuarneqarsinnaavoq.
Nunarput nunat killiit iligiivinut ilaasoq
Kalaalit Nunaat nunat killiit illersoqatigiiffiannut
ilaavoq, tamannalu Kalaallit Nunaanni illersornissamik isumaqatigiissummut
1951-meersumut Danmarkip USA-llu isumaqatigiissutigisaanut, USA-llu NATO-p
ataani Kalaallit Nunaata illersornearneranut Danmarkimik ikiuunnissaa
isumaqatigiissummut ilaavoq.
- Nunarput nunat killiit illersoqatigiiffiannut ilaavoq,
nunanillu killernik illersornissakkut suleqateqarneq tunuliaqutaralugu,
ukiorpassuarni USA suleqatigaarput, tassanilu suleqatigiinnitta
annertusarnissaa politikikkut sulissutigaarput. Qinigaaffimmi uani
suleqatigiinnerup, Igalikumi isumaqatigiissut tunuliaqutaralugu
ingerlanneqartoq annertusarparput.
Taamaammallu ippassaq, ullumi aqagulu USA suleqatigissavarput, tassanilu kialuunniit præsidentiunera apeqqutaanngilaq. Maanna præsidentiusup oqaatigisai aalassatsitsipput, taamaammallu ataqqineqarnissatta nammineerlutalu nunatsinni oqartussaanermut pisinnaatitaaffeqarnerput aalajangiusimassavarput.
- Naalakkersuisut siulittaasuat, Múte Bourup Egede.
Taassuma inuiaat
kalaallit qallunaajorusunnginnerat, amerikamiorusunnginnerat
kalaaliorusunnerallu erseqqissarpaa.
Qanorluunniit tatineqartigigaluarutta
aalajangisuimannippugut
Donald Trumpip præsidentitut ivertinneqarnissani
sioqqullugu oqaaseqaatai, Kalaallit Nunaanni innuttaasunik Naalakkersuisunillu
aalassatsitsisut, Múte Bourup Egede nassuiaavoq.
- Kalaallit Nunaata nakkutigilernissaa siunertaralugu
sakkutuunik atuisinnaaneq amerkiamiut piffissami kingullermi oqaatigisaat,
minnerunngitsumillu piffissami kingullermi qallunaat oqariartuutaat
innuttaasunut annertuumik sunniipput. Ingammik qallunaat politikeriisa
oqaaseqaataat sakkortusinnaasartut, maanilu immaqa sungiusimasavut piffissamilu
sivisuumi akiukkavut eqqissisimajunnaarsitsillutillu innuttaasunik
aarlerilersitsipput, taamaammallu partii apeqqutaatinnagu
ataatsimoortariaqarpugut, Múte Bourup Egede oqarpoq.
Trumpip oqaaseqaatai piffissami Naalakkerusisut
qallunaat naalakkersuisuisa Naalakkersuisut qulaatiinnarlugit
aalajangertarnerannik naammaginninnginnermik oqariartorfianni pipput.
- Trumpip oqaatigisai qaqugumulluunniit akuersaarneqarsinnaanngillat, ingammik piffissami qallunaat naalakkersuisuisa pissusaannut naammagiliinerup nalaani. Maannalu alloriarneq tulleq tiguleruttorparput. Oqaatigineqartut ingalluni sakkortusiallallutik aalassatsitsipput, ullut naligiinngiffiusumik ingerlaarfiusimasoq qulaatiinnarlutalu pissuseqartarnermut akiuunneq naammangiliineq, taakkua pisut saniatigut taama pisoqarpoq.
- Naalakkersuisut Siulittaasuat, Múte Bourup Egede.
Taamaammat ataatsimoornissaq pillugu taassuma partiit
siulittaasui ingerlaavartumik naapittarpai, USA-llu Kalaallit Nunaannut
soqutiginninnerani ineriartorneq kingulleq, tamanut itisilersinnaanngisani,
oqaloqatigiissutigisarlugu.
- Kalaallit Nunaata siunissaata inuiannit kalaallinit
aalajangerneqarnissaa pingaarnerpaavoq, tamannalu
ataatsimoorfigilluinnarparput. Kalaallit Nunarput pineqartillugu peqataatinneqartassaagut.
Qanorluunniit tatineqartigigaluarutta Kalaallit Nunaata siunissaata inuiannit
kalaallinit aalajangerneqartussaanera, imminullu oqartussaaffiginitta aamma
siunissamut qularnaarnissaa immeraassutigineqarsinnaanngilaq. Tamanna partiimut
sorlermulluunniit ilaasortaagaluartutta isumaqatigiissutigaarput. Tamannalu
uatsinnut nukittuunngortitsivoq, Múte Bourup Egede oqarpoq.
