KNI: Kukkunersiuinermut aningaasartuutit ukiut marluk ingerlaneranni affaat sinnerlugit ikileriartut

KNI-mi aqutsisut oqiliallassimassapput suliffeqarfiup namminersorlutik oqartussanit pigineqartup ukiuni kingullerni kanngunartuliornerit ukiumoortumik nalunaarusiaani, aggustip 16-iani ataatsimeersuarnermi akuerineqartussami, eqqaaneqartariaarummat.

Naatsorsuuserisuni pisortaasimasumut eqqartuussineq suli naammassinngikkaluartoq, tassami Nunatta eqqartuussiviani inaarutaasumik aalajangiiffigineqarnissaa utaqqineqarpoq. KNI-p Østre Landsret-imi 2023-mi decembarimi eqqartuussinermi ajugaaffigigaluarpaa, tassanilu aalajangerneqarpoq naatsorsuuserisoq 5 millionit koruunit missaannik KNI-mut utertitsissutigisassagaa.

Saniatigut iluanaarut

Nalikillisitsinerit iluarsaanneqarneranni, naatsorsuuserisut pisortarisimasaata pissusilersuutigisimasaasa paasineqarneranit saniatigut iluanaarutitaqarpoq. PwC-p ukiut arlallit naatsorsuutai misissoqqissaarsimavai, akileraarutillu ilanngaatigereerlugit 341 millionit koruuninik nalikillisinneqarsimapput.

Kukkunersiuisut iluarsaassinerat akikitsuinnaasimanngilaq, kisianni ukiumut naatsorsuutinut kingullernut atatillugu suliffeqarfissuup kukkunersiuinermut aningaasartuutai 5,2 mio. kr.-iupput, tassa ukiup siulianut sanilliullugu 2 mio. kr.-inik ikinnerullutik. Tamatuma saniatigut ukiumut naatsorsuusiorfimmut 2021/22-mut sanilliullugu affaat sinnerlugit ikinnerupput, tassani kukkunersiuinermut aningaasartuutit 11,8 mio. kr.-iupput.

Peqquserluttoqaqqinnginnissaa anguniarlugu Namminersorlutillu Oqartussat suliffeqarfiutaat peqquserlunnermik pinaveersaartitsiniarluni Fraud Management Program-i atulerneqarpoq, tamannalu suliffeqarfiit kukkunersiuinermut aningaasartuutaannik annertusinerannik kinguneqarpoq.