Internetikkut saassussineq millionilinnik akeqartoq

Ukiup aallartinnerani internetikkut saassussinermi aningaasartuutit matussuserniarlugit Asiap 1,2 million koruuninik aningaasaliiffigineqaqqinnissaminut qinnuteqaataa Aningaasaqarnermut Akileraartarnermullu Ataatsimiititaliap akuersissutigaa.

Mads Christensenip, Asiami aningaasaqarnermut allattoqarfimmilu pisortap, aningaasaliisoqaqqinnera nuannaarutigaa.

Aningaasanik tunniussisoqanngitsoq

- Asiaq marsimi internetikkut saassussineq pissutigalugu ingerlatsinermi atortunik pingaarutilinnik, paasissutissanik attaveqaatinillu pilersitseqqinnermut immikkut ittumik aningaasartuuteqarpoq. Tamatuma saniatigut pilersitseqqinnerup kingorna nalinginnaasumik ingerlatsineq sapinngisamik pitsaanerpaamik qulakkeerniarlugu attatiinnarniarlugulu qarasaasiaqarnermi isumannaallisaanermik immikkut ilisimasallit misissuinissaannut nakkutilliinissaannullu aningaasartuuteqarpugut, Mads Christensen Sermitsiamut nassuiaavoq.

Qarasaasiatigut pinerlunniat saassussisut aningaasanik tunineqarsimanngitsit erseqqissarpaa.

Ransomware-mik saassussinermik taaneqartartoq pineqartoq, tassa qarasaasiatigut pinerlunniat suliffeqarfiit paasissutissaannik atortuinik iserfigineqarsinnaajunnaarsitsinikkut aningaasanik qinnuteqartoqartoq Asiap pisortaata Mette Skarregaardip siusinnerusukkut nassuiarpaa.

Asiap assersuutigalugu qaammataasat dronellu atorlugit Kalaallit Nunaanni avatangiisit pillugit paasissutissanik katersineq pingaarnertut suliassaraa.