Naalakkersuisut uranimikpiiaaffiit qularnartoqartippaat
Aatsitassanulli naalakkersuisup Kim Kielsenip uranimik saniatigut tunisassiorsinnaaneq mattutivinngilaa.
– Avatangiisit inuuniutigaagut.
Taamatut Sermitsiamut oqarpoq aatsitassanut naalakkersuisoq Kim Kielsen, Siumut, taamaasillunilu aamma Kalaallit Nunaani uranimik piiaaffinnut qularnartoqartitsinini takutillugu.
– Nerisavut avammut tuniniakkavut takornariaqarnerpullu avatangiisinik minguitsunik ajoqusersimanngitsunillu tunngaveqarput, radioaktivimillu mingutsitsineq sutigut tamatigut Kalaallit Nunaannut ajunaarnersuussaaq.
Qularnartoqartitsigaluarluni Kim Kielsen piffissami aggersumi innuttaasunik ataatsimiititseqattaassaaq, Kalaallit Nunaanni uranimik piiaaffinnik pilersitsinissaq oqallisigitinniarlugu.
Ataatsimiinneq siulleq pivoq sisamanngormat unnukkut Nuummi, aasamilu sulinngiffeqareernerup kingorna Sisimiuni, Narsami Qaqortumilu ataatsimiititsisoqassaaq.
Illoqarfiit tamakkua toqqarneqarsimapput pissutigalugu uranimik piiaasoqassappat tamakkua eqqaanniissammata.
Innuttaasut oqallitsillugit
Kim Kielsenip aatsitassanut naalakkersuisutut siuliata Jørgen Wæver Johansenip, Siumut, nassuiaasiortitsisimavoq »Kalaallit Nunaanni uranimik ujaasinerup piiaanerullu inuiaqatigiinnut kinguneqaatissai«.
– Nassuiaat pisimavarput, namminerlu qularnartoqartitsigaluarlunga oqallinneq unitsinnianngilara, Kim Kielsen oqarpoq.
– Urani kuultip, diamantit olivinillu akerlianik aatsitassaq akerleriiffiuvoq, qulakkiissavarpullu innuttaasunit tapersersorneqarnissarput uranimik piiaalinnginnitsinni.
– Tamannalu taamaallaat pisinnaavoq innuttaasut isumasioqatigalugit, Kim Kielsen oqarpoq.