Alliamut saaffiginnittut amerleriarujussimasut

Alliami katsorsartinnissamut innersuunneqartut 2022-mi amerleriarput. 2021-mi 79-iusimasut, 2022-mi 119-iupput.

Amerleriaat 33 procentiuvoq. Alliaq pillugu ukiumoortumik nalunaarusiaq isumaginninnermut aqutsisoqarfimmit suliarineqarsimasoq tamanna takutippaa. Amerlanerit ikiorneqarumallutik saaffiginnittarnerat pitsaasuusoq, Isumaginninnermut Aqutsisoqarfiup erseqqissarpaa.

- Tamatumani isumaqarpoq qanigisariinni nakuusertoqartarnera unitsinniarlugu ikiortissarsiortartut amerlisimasut - ikiortissarsiortut amerlineri tassaavoq ineriartorneq pitsassuaq, tamatumanissaaq nakuusertoqartarnerata eqqartugassaanngitsutut isiginneriaaseqartoqartarnera paquminarunnaarsarneqarmat, ukumoortumik nalunaarusiap saqqummiunneqarnerani Isumaginninnermut Aqutsisoqarfik allappoq.

Innuttaasut inuusunnerit ikiortissarsiortarput

Kisitsisit misissuataraanni, paasinarsivoq inersimasut 40-t ataallugit ukiullit ikiorneqarumallutik saaffiginnissimasuni amerlanerusut.

Innersuunneqartuni 119-iusuni 71-it tassaapput inersimasut 18-29-t akornanni aamma 30-39 akornanni ukiullit.

40-nik ukiulinniit qummut innersuunneqartut ikiartorput.

- Nakuusertartuugaanni tamassuma tungaatigut nipangiusimajunnaarnissamut sapiissuseqartariaqarpoq. Taamaattumik nakuusertarneq unitsinniarlugu katsorsarneqarnissamik neqeroorummik arlaqarnerusut atuilernerat pitsaasuuvoq, taama oqarpoq Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen (IA).

Kalaallit Nunaata Politiivisa ukiumut kisitsisaataat naapertorlugit persuttaasimasut nalunaarutigineqartut 2022-mi 1090-iupput. Ukiup siulianit ikileriaateqarpoq, 2021-imi persuttaanerit 1348-t nalunaarutigineqarsimammata.

Meeqqat persuttaasunik isigisaqartartut

Alliaq pillugu ukiumoortumut nalunaarummi atuarneqarsinnaavoq ikiorneqarnissamik saaffiginnittut amerlanertigut angerlarsimaffimmi meeraqartut. Saaffiginnittut affaasa missaat nalunaarutigisimavaat 18-t ataallugit ukioqartunik meeraqarlutik najugaqatigisaminnik.

- Tamatuma erseqqissisippaa meeqqat amerlanerpaartaasa angerlarsimaffimmi persuttaasarnermik misigisaqartartut, tamanna meeqqat inersimasunngornerminni namminneerlutik persuttaasalernissaannut sunniuteqaqataasinnaavoq. Inersimasunngornereerluni persuttaasalernissamut aarlerinaatit annersaraat, meeraanermi persuttaanermik misigisaqarsimaneq imaluunniit eqqugaasimaneq, ukiumoortumik nalunaarusiami erseqqissarneqarpoq.

Erseqqissarneqarpoq persuttaasarneq pillugu katsorsartinnissamik saaffiginnittut angerlarsimaffimmi meerartaqartut salliunneqartartut.

Ukiumut nalunaarusiaq naapertorlugu suiaassutsit akornanni nikingassut ukiup siulianut aamma nikeriaateqarsimavoq. Saaffiginnittuni arnat 2021-mi 39 procentiusimapput, 2022-mili 45 procentiullutik amerleriarsimallutik. 55 procentit angutaapput.

Alliap katsorsaaneq eqaannerulersinniaraa

Ukioq 2022 pillugu nalunaarusiaq tunngavigalugu Alliaq 2023-mi suliniutigisinnaasaminik marlunnik aallutaqassalluni suliaqarpoq. Sullissisunut, persuttaanermik eqqugaasunut persuttaasartunullu paasissutissanik tunniussuunneqarsinnaasunik suliaqartoqassaaq. Innuttaasullu persuttaasarnermik nassueruteqarlutik ikiortissarsiortut katsorsarneqarnissaat piaarnerusumik pisinnaaqqullugu Alliaq suliniuteqarniarpoq.

Alliap oqarasuaatikkut ammasarfini ukioq manna sivitsorpai, ullut tamaasa 9.00-imiit 21.00-imut sianerfigineqarsinnaalerluni.

Katsorsaasartut amerlanerulertinniarlugit Alliami katsorsaasumik ukioq manna aamma atorfinitsitsisoqassaaq.