Kalaallit Nunaanni peqqarniisaarniartoqarsinnaanera PET-p annikitsutut nalilerpaa
Kalaallit Nunaannut peqqarniisaarniartoqarnissaanut navianartorsiorneq appasissumiittoq, Politiets Efterretningstjenestep (PET) nalilerpaa.
Kunngeqarfimmut peqqarniisaarniartoqarnissaanik navianarsinnaasut pillugit nalunaarusiaq Center for Terroranalysemit (CTA) PET-p ataaniittumit saqqummiunneqaqqammerpoq.
Kalaallit Nunaanni peqqarniissaarniartoqarnissaanut navianartorsiorneq annikitsuararsuusoq, CTA allappoq:
- Ukiumi kingullermi Kalaallit Nunaannut peqqarniisaarniartoqarnissaanik navianartorsiortitsinermik sakkortusititsisumik peqarneranik CTA ilisimasaqanngilaq. Kalaallit Nunaanni peqqarniisaarniartarneq Danmarkimit siamasinnginnerusoq, CTA naliliivoq.
Immikkoortumi 'annikitsoq' isumaqarpoq 'navianarsinnaasunik takussutissaqanngitsoq. Siunertaqarnermut, piginnaassuseqqortussusermut imaluunniit marluutillugit atugaanngillat.'
Inuusuttut eqqugaaratarsinnaasut sunnertianerusinnaasut
CTA-li nangilluni allappoq, peqqarniisaarniartitsilluni sunniiniartartut Kalaallit Nunaanni innuttaasut peqqarniitsumik iliuuseqartinniarlugit sunnersinnaagaat.
- Inuusuttut inuuniarnermikkut ajornartorsiortut eqqugaaratarsinnaanerusut sunnerneqaratarsinnaanerupput, nalunaarusiami tamanna allaqqavoq.
Tamatuma saniatigut misissuisarfiup aamma nunatsinni aallaasinik pissarsisinnaaneq oqaaseqarfigaat:
- Naalagaaffeqatigiit sinnerinut sanilliullugu Kalaallit Nunaanni aallaasinik qaartiterutinillu pissarsiuminarnerata annertuumik ajoqusiisumik saassussisinnaanermut pariarfissaq annertunerulersissinnaagaa, CTA naliliivoq, Center for Terroranalyse allappoq.
Danmarkimut navianartorsiortitsineq
Misissuisarfik Kalaallit Nunaannut navianartorsiortitsisunik nassaanngilaq, kisianni Danmarkimi allatut inissisimasoqarpoq.
Tassani peqqarniisaarniartoqarnissaanut qaffasissuseq ”ilungersunarpoq”, sulilu islamisiortut sakkulersortut Danmarkimi peqqarniisaarniarnissamut aamma danskit nunani allani soqutigisaannut navianartorsiortitsinerpaapput.
CTA aamma navianartorsiortitsisumik nutaamik hybridiseringimik allataqarpoq:
- Nunani Killerni Danmarkimilu inuit ataasiakkaat nammineq silarsuarminnik akerarisaminnillu akuliussillutik, isummaminnik upperisaminnillu tunngaveqartitsisut takussaaleraluttuinnarput, taakkulu aamma pilersaaqatigiipiluttoqarsorinninnermik, nakuusernermullu sakkortuumik nuannarinninnermut aamma tarnikkut napparsimanermut tunngasut, Michael Hamann, CTA-mi pisortaq oqarpoq.