Ministereqarfik uppernarsaavoq: Naalakkersuisut peqqinnissaqarfimmi ikiorneqarnissamik qinnuiginnipput
Danskit Sundhedsministeriaata Kalaallit Nunaata peqqinnissaqarfimmi pisariaqartitaannik akuersinissamut periarfissat suunersut misissuiffigileruttorpai.
Nunatsinni peqqinnissaqarfik tatineqartoq pillugu oqallinneq ukiorpassuarni ingerlavoq, naak suliassaqarfik angerlaanneqarnikuugaluartoq, peqqinnissaqarfik Folketingimut qinersisoqarnissaanut qineqqusaarnermi ukiaq pingaarnertut qulequtarineqarpoq.
Peqqinnissaqarfik ilaatigut sulisussaaleqivoq, qineqqusaarnermilu partiinit tallimanit sisamat Danmarkimut ikioqqunissamik kissaateqarput. Oqariartuut taanna Naalakkersuisunut annguppoq, taakkulu maanna pisortatigoortumik danskit naalakkersuisuinut peqqinnissaqarfimmi suliassaqarfimmi ikiorneqarumalluni saaffiginnittoqarpoq.
Ministereqarfik periarfissanik misissuivoq
Sundhedsministerium Sermitsiaq.AG-mut taama uppernarsaavoq:
- Indenrigs- og Sundhedsministeriep Naalakkersuisunit saaffiginnittoqarsimasoq uppernarsarsinnaavaa.
- Indenrigs- og Sundhedsministeriep Kalaallit Nunaata pisariaqartitaanni periarfissat suut akuerisinnaanerlugit misissuleruttorpaa, ministereqarfik naatsumik allagaqarluni akissuteqarpoq.
Ministereqarfik saaffiginnissutip imarisaa pillugu aalajangersimasumik oqaatiginissaa kissaatiginngilaa, Naalakkersuisunullu innersuussivoq.
Qineqqusaarnermi siunnersuutit arlallit
Sermitsiaq.AG-p peqqissutsimut naalakkersuisoq, Mimi Karlsen (IA), suliaq pillugu oqaaseqartinniarlugu sulissutigaa.
Folketingimut qineqqusaarnermi nunatsinni partiinit Danmarkip ikiuinerata qanoq aaqqinneqarsinnaanera pillugu arlalinnik siunnersuuteqarfigineqarpoq. Kalaallit innuttaasut danskit kræftertunut aningaasaliissutaannut Danmarkimi innuttaasut assigalugit atuisinnaanissaat IA-mit siunnersuutigineqarpoq. Naleqqamit siunnersuutigineqarpoq, nakorsiartut Danmarkimut katsorsartikkiartortut Danmarkip akiliuttassagai siunnersuutigineqarpoq.
Sapaatip akunnerani matumani Folketingimi oqallittoqarnerani ministeriuneq aamma partiimi siulittaasoq Mette Frederiksen (Soc.) oqarpoq, Kalaallit Nunaata Danmarkillu peqqinnissaqarfimmi suleqatigiinnerat annertusarneqartariaqartoq. Qanoq iliornikkulli tamanna pissanersoq erseqqissumik oqaatigiumanngilaa.
Qineqqusaarnermi Mette Frederiksenip erseqqissarpaa, Danmarkip Kalaallit Nunaat peqqinnissaqarfiup tungaatigut ikiussappagu, Naalakkersuisunit saaffiginnittoqarneratigut aaqqinneqartariaqartoq, suliassaqarfik Kalaallit Nunaata nammineq akisussaaffigimmagu.