Air Greenlandimit angalaffissaq nutaaq ammarneqarpoq
Ilaasut siulliit Danmarkimi Billundimit toqqaannartumik Kangerlussuarmut Air Greenlandimut ilaallutik pingasunngormat timmisartorput.
Timmisartortitseqatigiiffiup Billund Lufthavnimit Kangerlussuarmut aqqut ammarmagu, Air Greenlandip qalipaatai ilisarnartut pingasunngornermi gate 8-10-mi Billund Lufthavnimi takussaapput. Taamaalilluni maanna Jyllandimit Kangerlussuarmut toqqaannartumik sapaatip akunneranut ataasiarluni pingasunngornikkut timmisartortoqarsinnaalerpoq.
Ullaakkut timmisartup Kangerlussuup tungaanut aallannginnerani kaagiinik sassaallertoqarlunilu oqalugiartoqartoq, Billund Lufthavn tusagassiuutinut nalunaarummi ilisimatitsivoq.
Billund aqqummut nutaamut annertuumik isumalluartoq, mittarfiup pisortaa oqarpoq:
- Maanna Kalaallit Nunaannut toqqaannartumik attaveqalernerput Billund Lufthavnimit nuannaarutigeqaarput. Suleqatigiinneq iluatsilluartoq uagutsinnut Air Greenlandimullu naleqalersitsisoq aallartillutigu qularinngilarput, kisianni aamma innuttaasunut maanna tikeraarnissamut aamma ikinngutiniit ilaquttaniillu tikeraarneqarnissamut pisariinnerulersitsimmat, Jan Hessellund, Billund Lufthavnimi pisortaaneq oqarpoq.
Angalariaatsit misissorneqarsimasut
Pisortap oqarnera naapertorlugu Danmarkip kitaanit Kalaallit Nunaannut aqqut piumaneqartupilussuuvoq.
Air Greenlandimi aqqutip pilersinneqarneranut atatillugu misissueqqaartoqarnikuuvoq, pisisartullu angalariaasaannik misissuisoqarnikuulluni, pisisartullu amerlasuut ullumikkut Kangerlussuup Københavnillu akornanni angalasartut amerlasuut Københavnimut tikikkaangamik Jyllandiliartartut paasineqarsimavoq:
- Taakkunannga ikinngitsut Københavnimut pinnatik Billundimut timmisartortarnissaat naleqqulluinnarpoq, Air Greenlandimi tuniniaanermut pisortaq, Henrik Bjørner Søes oqarpoq, nangillunilu:
- Timmisartornissamut siullermut qilanaaqaagut, piumaneqarnera naammassappat Jyllandimut tassanngaanniillu angallannerup annertusinissaa qilanaaraarput.
Takornariartitsinermut iluaqutaassasoq
Aqqutip nutaap kalaallit nunaminnut tikeraartussat iluaqutigisinnaassagaa neriuutigineqarpoq, takornariartitsinermullu iluaqutaasinnaanissaa, angalasut amerlanerusut maanna Danmarkip kitaanit toqqaannartumik Københavniliaqqaarnartik toqqaannartumik tikissinnaalissammata.
Anne Nivika Grødem Visit Greenlandimeersoq danskit Kalaallit Nunaannut tikilluaqqunissaannut qilanaarpoq:
- Danmark takornariartitsinikkut niuernermi Kalaallit Nunaannut pingaarutilerujussuuvoq, timmisartumillu Billund Lufthavnimit aqqut nutaaq, Jyllandimit angalasunut Kalaallit Nunaannut timmisartornissamut pisariinnerusumik periarfissaqalersitsivoq. Tikeraartussat nunatsinnut tikilluaqqunissaannut qilanaarpugut – ukioq kaajallallugu aamma nunatsinni tikitassanut tamanut, Annee Nivika Grødem, tusagassiuutinut nalunaarummi oqarpoq.