Kielsen isornartorsiummut akerliisoq: – Tamat oqartussaaqataaneranni ajornartorsiuteqarpugut
Nuna tamakkerlugu politikkimi arnat ukiukitsunik meerallitikippallaarput.
Marlunngornermi apriilip 6-ani 2021- mi qinersisoqarnerani Inatsisartuni inissanit 31-nit qulit arnanit inuttalerneqarput, taakkualu ullormi qinersiviusumi agguaqatigiissillugu 51-inik ukioqarlutik. Ukiup aappaata affaata qaangiunnerani sulinngiffeqartoqarnera tunuartoqarneranulu pissutaallutik arnat arfineq-marluinnaat sinnerussimapput, taakkualu ullumikkut agguaqatigiissillugu 50-inik ukioqarput.
Aviisi Sermitsiaq allappoq.
Kalaallit Nunaanni innuttaasut katitigaanerannut sinniisuusumik tamat oqartussaaqataanerat unnersiutigisarparput, kisianni Inatsisartut siulittaasuat Kim Kielsen, Siumut, arnat ukiukitsunik meerallit Inatsisartuni sinniisuutitaqarnerunissaannik ujartuivoq.
Inatsisartut ataatsimiinnerat ullumi aallartissaaq, tamannalu pissalluni innuttaasut akornanni aamma nittartakkani inuit attaveqatigiittarfiini sakkortuumik isornartorsiuisoqaleruttortoq. Isornartorsiuinermut pissutaapput Suliniut Tuulliit, Inatsisartunut ilaasortat sinerissameersut Nuummi aalajangersimasumik inissaannik 24-nik sanaartorfiusoq, aamma ataatsimiinnerit nalaanni ilaasortat sinerissameersut ilaqutaasa Nuummut akiliunneqarlutik angalasarnerisa marloriaatinngortinneqarnissaannik inatsisissatut siunnersuut.
Kim Kielsen Sermitsiamut oqarpoq, inissialiorneq ilaqutaasullu akiliunneqarlutik angalasarnerat tamarmik immikkut Inatsisartuni sulinissamut atugassarititaasut pitsanngorsarneqarnissaannik suliniarnertut isigineqassasut – arnanuinnaanngitsoq ukiukitsunik meeralinnut, kisianni ilaasortanut 31-nut tamanut.
Periarfissat Siulittaasoqarfimmit isumaliutigineqartut pingajuat, tassaavoq inersuarmi ataatsimeeriaatsimik allanngortitsineq, sulinerup ataatsimiinnernut eqikkagaasunut marlunnut amerlanertigut ulapaarfiusorujussuusumik naggaataasersorfiusartunut killilersimaneqarunnaartillugu ukioq tamakkerlugu siammarneqarluni ingerlanneqarfigisaligassaa.
– Sulinissamut atugassarititaasunik pitsanngorsaanikkut neriuutigaara Inatsisartut siunissami katitigaanerat innuttaasut katitigaanerannut ullumikkornit naapertuunnerulissasoq, Kim Kielsen oqarpoq.
Ilanngutassiaq tamaat aviisimi Sermisiami sapaatip-akunnerani matumani saqqummersumi atuaruk, ugguuna iserfigisinnaavat: