Kultureqarnermut ministeri: Danskimik filmiliornermik aqutsisumik suleqateqarnikkut kalaallit filmiinut aningaasaliisoqarsinnaavoq

Kalaallit filmiliai Det Danske Filminstitutikkut piumasaqaatit malinnerisigut aningaasaliiffigineqarsinnaapput, Danmarkimi kultureqarnermut ministeri ilisimatitsivoq. Taamaattoq pitsaanerusumik qanoq aningaasaliisoqarsinnaaneranik paasissutissiisoqarsinnaanersoq piasariaqartoq oqaatigaa.

Kalaallit filmiliaat Danmarkimit aningaasatigut taperneqarsinnaappat? Folketingimi ilaasortap Aaja Chemnitz Drieferip (IA) tamanna Folketingimut apeqqutiginikuuaa.

Piumasaqaatit malinneqarpata kalaallit filmiliaannut aningaasaliisoqarsinnaasoq danskit kultureqarnermut ministeriat Ane Halsboe-Jørgensen (Soc.) ilisimatitsivoq.

Filmiliornikkut inatsitigut Det Danske Filminstitutikkut aningaasaliisoqarsinnaavoq, ministeri akissuteqarpoq. Kalaallilli filmiliornikkut inatsisitigut peqataanngillat, Namminersorlutik Oqartussat kultureqarnermut Naalakkersuisoqarfik angerlaatereernikuummagu, taamaattumik danskit inatsisaat malillugu kalaallit filmii aningaasaliiffigineqarsinnaanngillat.

Suleqatigiinnikkut filmiliat aningaasaliiffigineqarsinnaapput

Naak oqartussaaffik angerlaanneqarnikuugaluartoq Det Danske Filminstitut aqqutigalugu Kalaallit Nunaannut kalaallisulluunniit filmilianut aningaasaliisoqarsinnaavoq. Tamanna suleqatigiittoqarneratigut piviusunngorsinnaavoq. Kalaaleq filmiliornermik aqutsisoq danskimik filmiliornermik aqutsisumik suleqateqarpat aningaasaliiffigineqarnissamut qinnuteqartoqarsinnaavoq. ministeri nassuaavoq, periarfissarlu alla aamma tikkuarlugu:

- Danmarkimi filmiliornermik aqutsisoq Kalaallit Nunaanni filmiliorniaruni, aningaasaliiffigineqarsinnaavoq. Aamma filmi kalaallisut oqaaseqartuuppat aamma taperneqarsinnaalluni. Filmiliorniarneq aningaasaliiffigineqartussatut tulluarpat, aningaasaliiffigineqarsinnaavoq, akissutigineqarpoq.

Film.gl folketingimi Kalaallit Nunaat pillugu ataatsimiititaliamut saaffiginnissuteqarnikuuvoq. Tassani Inatsisit isumaqatigiissutillu pissutaallutik Kalaallit Nunaannit Danmarkimiillu filmiliortartut suleqatigiinniarnerat killeqarsinnaasartoq Film.gl-ip tikkuarnikuuaa.

Qanoq suleqatigiinniarneq eqaallisarneqarsinnaanersoq sulissutigineqassasoq danskit kultureqarnermut ministeriat oqarpoq:

Allannguiniarnermi partiit suleqataassapput

- Kalaallit Nunaat danskit filmiliornermut inatsisaanniinngikkaluartoq Kalaallit Nunaanni filmiliorneq siuarsarniarlugu danskit filmiliortartuinut tapiisarnerannut akuutinneqalersinnaapput.

- Qanoq danskit filmiliortartui kalaallinik filmiliortartuinik suleqateqarnermikkut tapiisoqarsinnaanersoq eqaallisaasoqartariaqarpoq, ministeri akissuteqaammi allappoq.

Filmiliortunut tapiisarnermut isumaqatiginninniartoqalerpat kulturimut oqaaseqartartut ajornartorsiut pillugu oqaloqatigiikkumaartut oqaatigaa.

Aaja: Ajugaaneruvoq

Ministerip inatsisit misissortussanngorpai, tamannalu Aaja Chemnitz Larsenip ajugaanertut isigaa.

- Filmiliortartut Kalaallit Nunaanni najugallit filmiliortartut Danmarkimi najugallit assigalugit suliniutiminnut tapiiffigineqarnissaminnut qinnuteqarsinnaasariaqarput.Tamanna Nunatsinni filmiliortartut pikkorissut ineriartortillugillu pigiinnarnissaannut pingaaruteqarluinnarpoq, Aaja Chemnitz Driefer tusagassiutinut nalunaarummi oqarpoq.

Film.gl-ip taamatut oqariartuuteqarnera nuannaarutigaa:

- Maannakkorpiaq Kalaallit Nunaanni filmiliortarnermut aningaasanik immikkoorsisoqarnikuunngilaq, taamatuttaaq kalaallit filmiliortartut nunanit tamalaanit aningaasassarsiornissaannut periarfissiisoqarnikuunngilaq. Taamaammat Film.gl-ip nuannaarutigaa, kalaallit filmiliaasa Danmarkimit tapiiffigineqartarnissaat pillugu oqallinnissamut periarfissanik ammaassisoqarmat, Klaus Georg Hansen, Film.gl-imi siulittaasoq oqarpoq.

Powered by Labrador CMS