Nutaanik pisassiisoqareersoq: Ilisimatusartup qernertanik qilalugaqassuseq ernummatigigaa

Naalakkersuisut aalajangiipput aqutsiveqarfik Ittoqqortoormiinut tallimanik, aqutsiveqarfik Tasiilamut 15-inik kiisalu aqutsiveqarfik Qaanaamut 20-nik immikkut qilalukkanik qernertanik pisassiisoqassasoq. Namminersorlutik Oqartussat sisamanngornermi tusagassiorfinnut nalunaaruteqarlutik ilisimatitsipput.

Qilalukkanik qernertanik pisassiisoqarnerusarnissaa partiinit arlalinnit kissaatigineqarpoq. Naalakkersuisooqataasut Naleqqakkormiut illuatungiliuttullu partiiannit Siumumit amerlanerusunik pisassiisoqartarnissaa siusinnerusukkut piumasarineqarsimavoq.

Pisassiissutilli amerlineqarnerat ilisimatuussutsikkut siunnersuuutigineqartunut toqqaannartumik akerliupput, Pinngortitaleriffimmiillu Tunumi pisassiissutinik qaffaaneq ernummatigineqarpoq:

- Pisassiissutinik qaffaaneq pingaartumik Tunumut ilungersunartuuvoq. Tunumimi pisarineqartartut amerlavallaareerput, qilalukkallu amerlassusaat eqqarsaatigalugit amerlanerusumik piniartoqarsinnaanngilaq. Siunissami qernertanik qilalugaqassappat eqqissisinneqartariaqarput.

- Amerlanerusunik piniartoqartarnerata malitsigisaanik qilalukkat qernertat tammassapput, Pinngortitaleriffimmi Uumasunut miluumasunut Timmissanullu immikkoortortaqarfimmi pisortaq ilisimatusartorlu Fernando Ugarte oqarpoq.

Siunnersuineq: Qilalukkat nungutaariaannaapput

Fernando Ugartep nassuiaatigaa, NAMMCO-mi ilisimatuussutsikkut ataatsimiititaliamit inassutigineqarsimasoq, Tunumi qilalukkanik qernertanik piniartoqassanngitsoq. NAMMCO-p piniartut eqqarsaatigalugit siunnersuutigisimavaa, Tasiilami qulit, Kangerlussuarmi qulit pisarineqartassasut Ittoqqortoormiinilu pisaqartoqartassanngitsoq.

NAMMCO-mi ilisimatuussutsikkut ataatsimiititaliap Tunumi qernertanik qilalugarniartoqartannginnissaa inassutigisimavaa, ataatsimiititaliamit isumaqartoqarmat, Tunumi qilalukkat qernertat ikippallaaqimmata, piniartuarneqarnermikkut nungutaariaannaammata.

Takussutissami tulliuttumi, Naalakkersuisut pisassiissutinik qaffaasoqarnissaanik aalajanginnginneranni, Tunumi aqutsiveqarfinni pingasuusuni qilalukkat qernertat qanoq inissisimanersut takuneqarsinnaapput:

Fernando Ugartep Qaanaami pisassiissutinik qaffaaneq ernumanartippallaanngilaa, nassuiaatigaali piniartarneq nungusaataanngitsumik ingerlanneqarunanngitsoq:

- Qaanaap eqqaani Inglefield Bredningimi pisarineqartartut 2019-imi 2020-milu pisassiissutissatut siunnersuutigineqarsimasunit amerlanerusarsimapput, taamaammat 2021-mi immikkut pisassiissuteqarneq nungusaataanngitsumik piniarnermut akorngusiisinnaavoq. Qaanaami Kitaanilu 2022-mi qernertanik qilalugartassiissutissat pillugit nutaamik siunnersuuteqartoqassaaq, Fernando Ugarte oqarpoq.

Politikkerit: Pisassiissutinik qaffaaneq naammanngilaq

Tasiilami immikkut qilalukkanik qernertanik 15-inik pisassiisoqaraluartoq, politikkerit pingasut ullormi pisassiissutinik qaffaasimanermik nalunaaruteqarfiusumi naammagittaalliuuteqarput.

Politikkerit pingasut taakku tassaapput Emanuel Nûko (N), Naleraq Harald Bianco (IA) aamma Knud Mathiassen (IA).

Taakku pingasuullutik allapput, Tasiilami piniartut aningaasaqarnikkut ilungersunartorsiortuusut, qilalukkallu qernertat 15-it naammanngitsut. Piniartut juullernissaanut aningaasanik isertitaqarnissamut periarfissaqartinneqartussaapput, politikkerit pingasut amerlanerusunik pisassiisoqarnissaanik neriuuteqartut oqarput.