Avanaanut paasisassarsiorneq

Folketingip Kalaallit Nunaat pillugu ataatsimiititaliaa Qaanaamiit Aasiaat tikillugit angalaqqammerpoq.

Folketingsmedlemmerne besøgte også Dundas, kolonien under det karakteristiske fjeld, Uummannaq. Foto: Jyllands-Posten/Torben Stroyer

Folketingip Kalaallit Nunaat pillugu ataatsimiititaliaa septemberip arfineq pingajuanni Thule Air Basemi umiarsuarmut nakkutilliissummut Knud Rasmussenimut ikivoq.

Umiarsup ataatsimiititaliami ilaasortat arfineq pingasut Pituffimmut, Qaanaamut, Kullorsuarmut, Upernavimmut, Uummannamut, Ilulissanut Aasiannullu angallappai, ilaasullu septemberip 14-ianni timmisartumik Københavnimut uterput.

Knud Rasmussenimut ilaanerat nalaatsornerunngilaq, Grønlands Kommando nittartakkamini allappoq, taannami Kalaallit Nunaata kitaata avannarpassinnerusortaata umiarsuarnit angallaffiunerujussuanngorsimanera pissutigalugu sivisulaartumik Thulep eqqaaniissimavoq, glk.dk allappoq.

Ataatsimiititaliap Thulep eqqaamiut peqqissusiat paasiniaaffigaa, tamanna massakkorpiaq Danmarkip Kalaallit Nunaatalu suleqatigiissutigimmassuk. Ataatsimiititaliallu aamma silap pissusaasa allanngornerisa Kalaallit Nunaata avannarpasinnerusortaanut sunniutai nalilersorpai.

– Knud Rasmussenimut ilaalluni angalanermi aamma oqartussaassutsimut tunngasut, soorlu aalisarnermik nakkutilliineq, imaatigut annaassiniartarneq Kalaallit Nunaatalu imartaani isumannaallisaaneq paasisassarsiorfigineqarput, Grønlands Kommando allappoq.

Kalaallit Nunaat pillugu ataatsimiititaliaq ukiut tamaasa Kalaallit Nunaannut paasisassarsiortarpoq. Ukormanna angalaqataapput Britta Schall Holberg (V) siulittaasuugallartoq, Kim Andersen (V), Flemming Møller (V), Preben Rudiengaard (V), Mogens Jensen (S), Julie Rademacher (S), Torben Hansen (S), Niels Sindal (S), Henrik Brodersen (DF), Pernille Frahm (SF) aam Bente Dahl (RV).

Siulittaasoq Lars-Emil Johansen, Siumut, napparsimalluni angalaqataasinnaasimanngilaq.

Powered by Labrador CMS