Eqaluk: Anaananga toqummat eqqarsaqqaartariaqarsimavunga
IA-mi ilaasortaq Eqaluk Høegh qinersinerup kingorna Inatsisartuniilissanersoq uitsatigineqarsimavoq, maannali erseqqissumik nalunaarutigaa ukiuni sisamani Inatsisartuni issianissaminut piareerluni.
Eqaluk Høegh qinigaalluarpoq, qinigassanngortissimasullu akornanni taaguunneqarnerpaat qulingattut inississimalluni. Inatsisartunili issiassanersoq nalornissutigineqarsimavoq.
Naalakkersuisumut allataasimasoq inuiaqatigiinnilu oqallissaarisartoq Eqaluk Høegh martsip 16-iani Sermitsiaq.AG-mut oqarpoq,, ”kukkusoqarsimasoq, namminerlu Inatsisartunut qinigassanngortinnani”.
Taamatut nalunaaruteqarnera qinersisoqareersoq atuartartutta nalornissutigilersimavaat.
Taassuma sapaatiummat Facebookikkut nassuiaatigaa, anaanami toqunera napparsimaneratalu ingerlasimanera aliasuutigingamiuk taamatut nalunaaruteqarsimalluni.
- Qineqqusaarnissara qangali aalajangiusimajuarlugu – piffissanngormat nangaarujussualeraluarpunga. Ulloq taannarpiaq oqarnittuut misigissutsikka allamiipput. Eqqarsaatikka anaananniipput. Maqaasinermiipput. Politikkimiinnatik.
Aqaguanili ulloq qujanartumik allaaneruvoq.
- Qamuuna inissitassakka inisseriarakkit aalajangerpunga sassarniarlunga. Aliasunnera inissaqartinniarlugu, siunissannillu aalajangiisuutinniarlugu. Ilorpiakkut aamma nalunngilara, anaanami uniinnaqqunavianngikkaanga.
Qujasaqaangalu ullumikkut uniinnarsimannginnama, Eqaluk Høegh oqarpoq.