Kim Kielsen: Partiip immikkoortortaqarfii aaqqiissutissamik tikkuussisariaqarput

Siumup siulittaasorisimasaa Kim Kielsen Siumup ilumini pissaaneqarniunnerani apeqqusigassaanngitsumik ajugaavoq, maanna immikkoortortaqarfiit pisumut qisuariarnissaat utaqqimaarpaa.

Kim Kielsen naammagisimaarinnippoq, partiini ajunngitsumik qinersinermi angusaqarsimaneranut qulakkeerinneqataasimanini pillugu, massa Inuit Ataqatigiinnut ajorsaraluarlutik.

Aviisi Sermitsiaq taama allappoq.

Taanna isumaqarpoq ajorsarneq pinngitsoortinneqarsimasinnaagaluartoq, partiip Inatsisartuni ilaasortaatitai eqqissiviilliortitsisartut tamatumalu kingorna siulersuisuuninngortut isumatusaarnerusumik piviusorsiornerusumillu partiip anguniagaanut tunngatillugu aammalu naalakkersuisooqatigiiusimasut isumaqatigiissutaannut tunngatillugu iliuuseqartarsimasuugaluarunik, avammut paatsuunganartunik aammalu partiip anguniagaanut naapertuutinngitsunik naalakkersuisooqatigiinnermilu isumaqatigiissutaanngitsunik isummaminnik siammarterinnginnerminni:

– Siumut isigerusunneruvunga, taamaattorli qinigaaffimmi qaangiuttumi partiimi pisimasut ilinniarfigisariaqarpagut. Eqqissilluta sulisinnaatitaangaarnikuunngilagut, tassami qinigaaffik tamarluinnangajaat ajornartorsiornerit minnerusut annerusullu aqqusaartuartarsimavagut, ajornartorsiornerit tamakku avataaniit pilersitaanngillat, partiittali Inatsisartuni gruppip iluani pilersitaallutik. Pingaartumik nammineq soqutigsat imaluunniit aggerfimmik siuarsaanissamik aallaavilimmik soqutigisat aallaaviusarlutik. Uanga aammalu siulersuisuunerusimasut nukippassuit atornikuuagut eqqissiviilliortut eqqissisarniarsaralugit, aammalu eqqaasittuartariaqarsimavagut, partiip anguniagai aammalu naalakkersuisooqatigiinnissamut isumaqatigiissutit atuuttut naapertorlugit politikkitsinnik ingerlatsisariaqartugut. Eqqissisarpummi, taamaallaalli ajornartorsiutip nammineq pilersitap tulliata takkuteqqinnissaanut, Siumut sinnerlugu sassartut annertuumik ajugaasortaat Kim Kielsen Sermitsiamut oqarpoq. Kielsen 1.841 taaguunneqarpoq Erik Jensen 1.186-nik taaguunneqartoq.

Taassumali qaavatigut aamma maluginiagassaavoq Inatsisartuni ilaasortaasimasut Kielsenimut ersiinnartumik akerlilersueqqajaajuarsimasut ilaat arlalissuit Inatsisartuni ilaasortaajunnaartinneqartut. Qinersisartut taakku qinerumasimanngilaat. Assersuutigiinnarlugit Henrik Fleischer aamma Nikkulaat Jeremiassen.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS