Mútep kaffiliuutaa imaarunneq ajortoq
Naalakkersuisooqatigiilernissamut isumaqatiginninniarnissat aallarnerlugit pisortatigoortuunngitsumik kaffisoqatigiittoqarpoq, IA-mi siulittaasup Múte B. Egedep kaffisoqatigiinnermi qinersinerup inernera pillugu partiini allani siulittaasut ataasiakkaalugit oqaloqatigiissutigisarpai.
Naalakkersuisooqatigiinnissamut isumaqatiginninniarniviit suli aallartinneqanngillat, taamatut eseqqissaasarput partiini allani sisamani isumaqatiginninniartussaasut, politikkikkut siuttuusussamit Múte B. Egedemit kaffisoriartoqquneqarsimagaangamik.
Siumumi siulittaasup Erik Jensenip ilisimatitsissutigaa, siulittaasutut tulliuttut marluk peqatigalugit IA-p siuttuinik ataatsimeeqateqarsimallutik, ataatsimeeqatigiinnermilu ”isumaqatiginninniarniviit pineqaratik” ”pissutsinik paasiniaanerusoqarsimasoq”.
Demokraatit siulittaasuat Jens-Frederik Nielsen aamma taamatut oqaaseqarpoq. Atassutip siulittaasuata Aqqalu Jerimiassenip ilisimatitsissutigaa, IA-mi siuttunik ataatsimeeqateqaqqaareerami partiimi siulersuisut isumaqatiginninniarniviit aallartitsinnagit isumaat tusarusullugit ataatsimeeqatiginiarlugit.
Kaffisortarneq
Pele Brobergip Naleqqameersup ataatsimeeqatigiitsiarsimaneq qungujulalluni imatut oqaaseqarfigaa:
- Pisarnertut ingerlavoq. Ukiut ingerlanerini kaffisoqatigiittarsimaqaagut. Maannalu aamma ataasiarluta kaffisoqatigiippugut.
Taassuma isertuutinngilaa, IA tassaasoq isumaqatiginninniarnermik aqutsisussaq.
- Qaaqquneqaqqinnissarput maanna utaqqivarput, Pele Broberg innuttaasut peqqissusaat akigineqassanngippat Naleqqamit avaqqunneqarsinnaanngitsunik piumasaqaateqartoqanianngitsoq neriorsuisoq ilisimatitsivoq.