Inatsisartuni angutit amerlaneroqqilersut
Nunami pissaaneq Siumumit IA-mut nuunneqarpoq, Inatsisartunili suiaassutsit agguataarsimanerat allannguuteqanngilaq. Taamaattoq qinersisoqareersoq arnat angutillu amerlassusaasa nikingassutaat annerulaalersimavoq.
Inatsisartunut qinigaasut 31-t akornanni arnat aqqaniliungaluaramik maanna quliinnanngorsimapput.
Kalaallit Nunaanni Naligiissitaanermut Siunnersuisoqatigiit siulittaasuata Kathrine Bødkerip qinersinerup inernera pakatsissutigisimavaa.
- Matumani nuannaarutissatuaavoq arnat sassartut akornanni ikinnerulersimannginnerat, tassa qinigassanngortittunit katillugit 189-iusunit 56-it qinigassanngortissimammata. Qinersisartut arnat sassartut akilerlugit isertissimavaat. Tamanna nuannaarutigaara - ingerlalluarsimapput.
Arnat qulit angutillu 21-t Inatsisartuni issialermata, agguaqatigiissinneranni angutit 67,74 procentisut arnallu 32,26 procentisut amerlassuseqalerput.
- Tamatuma takutippaa naligiissitaanissamik suliaqarnitta sumut killissimanera. Inuiaqatigiittut aaqqissuussaanitta iluani naligiisitaanermut tunngassuteqartut aporfeqartinneqarput, qinersinerullu matuma takuteqqippaa suli anguniagassarpassuaqartugut aamma arnat suli sorsuutissaqartut, Kathrineq Bødker oqarpoq.
Politikkerit inuiaqatigiinnut tarrarsortariaqartut
Taassuma oqaatigaa, inatsisartut inuiaqatigiinnut tarrarsortariaqartut, inuiaqatigiinnimi arnat angutilllu naligiinnerusumik agguataarsimammata. Aamma isumaqarpoq, politikkeriunermi avatangiisit angutitulli arnanut pilerinartigisanngitsut.
Kathrine Bødkerip erseqqissaatigaa, matumani piginnaasat amigaatigineqanngitsut.
- Arnammi silassorissuullutillu piginnaasaqarluarput. Kisitsisitigut qiviassagaanni arnat angutitulli piginnaasaqartigipput. Taamaammat suiaassuseq tamatumani apeqqutaanngilaq, taanna oqarpoq
Arnat qulit qinerneqarsimasut Namminersorlutik Oqartussat oqaluttuarisaaneranni aatsaat taamak ikitsigipput. Taamaamma ingasattajaarnerunngilaq oqassagaanni Kalaallit Nunaanni nunamut tamarmut politikkimi naligiissitaaneq killormut ingerlasoq.
- Neriuutigaara arnat qulit takku qinigaasut arnat politikkimit tunuarsimaartarnerannik allanngueqataassasut, Kathrine Bødker oqarpoq.
Oqaluttuarisaaneq:
2018-imi arnat aqqaneq-marluk angutillu 19-it
2014-imi arnat 14-it angutillu 17-it
2013-imi arnat aqqanillit angutillu 20-t
2009-mi arnat aqqaneq-marluk angutillu 19-it
Inatsisartuni katitigaanera allanngorsinnaavoq, tassa qinigaasut ilaasa marlunnik qinigaaffeqalersut sulinngiffeqarnissaq aalajangissappassuk taamalu sinniisussamik allatut suiaassusilimmik aggersaasoqassappat.
Stine Egede (IA) nalunaaruteqareerpoq sulinngiffeqarniarluni, IA-lli sinniisussatut allattorsimaffiani sinniisussaq siulleq arnaammat agguataarsimanerat allannguuteqarnavianngilaq.