Inga Dora: Kim peqataaniarpa imaluunniit?

– Kim Kielsen partiip siunniussaanut peqataarusunnerluni peqataarusunnginnerluniluunniit aalajangertariaqalerpoq, Siumup siulittaasuata tullia Inga Dora Markussen erseqqissaavoq.

Qinersinerup inernera pissaanermillu tigumminnittut nikinnerat eqqarsaatigereerlugit siulittaasup tullia siumut isigerusuppoq, Kim Kielsenilli Danmarkimi nutaarsiassaqartitsivimmut Ritzaurimut ”Siumukkormiut imminnut uppisittut” pillugit oqaaseqarsimanera atuaramiuk nipaa kamaqalaarpasippoq.

- Qularutissaanngilaq Kimi qinersinermi Siumup siuariarneranut qulakkeerinneqataasoq. Tamanna nuannaarutigissavarput. Qineqqusaarnermili Kimip immitsinnut avissaartuutsinniarsimavaatigut, Inga Dora Markussen erseqqissaavoq.

Arlaleriarluni qaaqquneqartarsimasoq

- Kimip qineqqusaarnermut peqataatinneqarsimanani oqaatigisimavaa. Ilumuunnginnerusoqarsinnaanngilaq. Siulersuisut nutaat arlaleriarlutik qaaqqusarsimagaluarpaat, takkutinngisaannarporli, Inga Dora Markussen erseqqissaavoq.

Taassuma ilisimatitsissutigaa, Siumup Inatsisartuni politikkikkut gruppia nutaaq ippassaq ataatsimeeqatigiissimasoq qineqqusaarsimaneq oqaluuseriniarlugu.

- Inuk ataaseq takkutinngilaq. Aap Kim Kielsen takkutinngilaq, tamannalu pakatsinaqaaq. Soorunami takutinnginnerminut pissutissaqarluarsimasinnaavoq, uggoraarali, siulittaasup tullia eseqqissaavoq.

Taassuma oqaatigaa, nuna tamakkerlugu ataatsimeersuarnermi ajorsarsimaneq akueriuminaatsillugu immikkut kisimi taamatut ingerlatsiniarsarineq ingerlaannarsinnaanngitsoq, naak Siumut sinnerlugu qinigassanngortittunit Kim taaguunneqarnerpaasimagaluartoq.

Gruppitsinni qiimmassimaarpugut

- Inatsisartuni grupperput nutaaq ippassaq ataatsimiinnermi qiimmassimaarluarpoq. Tamatta siumut isigerusuppugut, inuussutullu nukissaqarluartut aqutsisut nutaat siunniussaannut naapertuuttumik politikkeqarnissaminnik takunnissinnaasut isertissinnaasimavagut, Inga Dora Markussen nassuiaavoq.

Taassuma qularutiginngilaa, naammattunik qinersisoqarsimannginnerminnut pissutaasoq qinersisartut ukiuni kingullerni politikkikkut ingerlatsinermik qatsussisimanerat, ingerlatsinermi Naalakkersuisut Siulittaasuat matoqqavallaarlunilu naalakkersuisunik naalakkesuisoqatigiinnillu taarsiikulaarpallaarsimalluni.

- Qinersisartut nuna tamakkerlugu ataatsimeersuarneq kisiat eqqaamasaqarfiginngilaat. Ukiuni tallimani arfinilinnilu kingullerni aqutsisimaneq qinersiartornerminni aamma eqqaamasimavaat, taanna qineqqusaarnerup saniatigut Kuannersuit pillugit tusarniaasimaneq ajortumik sunniuteqarsimasoq nassuerutigalugu nassuiaavoq.

Ilumoorussinngittoq?

Kim Kielsenip novembarimi nuna tamakkerlugu ataatsimeersuartoqarmalli iliuuserisarsimasai pillugit oqaaseq ”illumoorussinngittoq” atorusunngilaa.

- Kimmi partiimi siunniussassatsinnik suliaqaqataasimavoq, tamannalu pimoorullugu ingerlassimavaa. Paasisariaqalerpaali partiimi siulittaasuujunnaarsimanini, Inga Dora Markussen Kim Kielsen siulittaasunngorniunnermi ajorsarsimanerminik akuersaassasoq taamalu siunniussat aqutsisullu nutaat siunniussaannik malinnilissasoq neriuuteqartoq erseqqissaavoq.

- Soorlu isikkamik arsartoqaraangat. Ajorsaraanni inernerusoq akuerisariaqarpoq, siulittaasup tullia oqarpoq.