Ruslandip Nunatsinnik suleqateqarnini annerulersinniaraa

Miki Brønsip Ruslandimut ataqqinaammik konsulitut toqqagaanera Ruslandip Kalaallit Nunaatalu qaninnerusumik suleqatigiilernissaata ilaatut isigisariaqarpoq. Ruslandip aallartitaa Vladimir Barbin Sermitsiamit apersorneqartilluni taama oqarpoq. Tamatumunnga peqatigitillugu naalagaaffiit issittumiittut sakkutooqarnikkut aallartitaasa toqqaannartumik oqaloqatigiissinnaanissaat ujartorpaa.

Russit Danmarkimi aallartitaat Vladimir Barbin

Russit Danmarkimi aallartitaanut Vladimir Barbinimut apeqqutit mailikkut nassiunneqarput, aallartitallu akissutini qarasaasiakkut aamma nassiullugit, taamaalilluni akissutigineqartut malersorlugit apereqqissinnaanissamut periarfissaqarani, aviisi Sermitsiaq allappoq.

Rusland sooruna Kalaallit Nunaannik annerusumik suleqateqarusuttoq?

– Rusland isumaqarami Issittumi atugarissaarneq pitsaasumillu inissisimaneq nunat tamalaat silittumik suleqatigiinnerisigut taamaallaat anguneqarsinnaasoq. Tamatuma kinguneranik Kalaallit Nunaannut attaveqarnissaq soqutigineqartorujussuuvoq, tassuunakkummi nunarsuup immikkoortuanut ataatsimoorluta attuumassuteqarfigisatsinnut nungusaataanngitsumik ineriartortitsinissamut sunniivigeqatigiinnerput annerulersissinnaaniassagatsigu. Ineriartornerup tamatuma tapersersornissaa, Ruslandip Nuummi ataqqinaammik konsulianik pilersitsinerup siunertaraa.

– Rusland aamma Kalaallit Nunaat aalisarnerup tungaatigut suleqatigeereerput. Suliffeqarfissuaq “Polar Seafood” Ruslandimut niueqateqarnerminik iluaqutiginnippoq tassuunakkullu kalaallit-russillu attaveqaqatigiinnerannut siuarsaaqataalluni. Mr. Brøns Ruslandip Kalaallit Nunaanni ataqqinaammik konsulissaatut akuersisimammat, Ruslandip qujamasuutigeqaa.

Rusland aatsitassarsiorneq pillugu Kalaallit Nunaannik suleqatiginninnissaminik soqutiginnippa?

– Kalaallit Nunaanni isumalluutinik mineralinut tunngasunik ineriartortitsinissamut piffissami matumani ataatsimut pilersaaruteqartoqanngilaq. Pineqartumut atatillugu Ruslandimi suliffeqarfiit periarfissamik tamatuminnga paasisimasaqarnerulernissaat suli suliassaavoq.

Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:

Powered by Labrador CMS