Tunillaassuunnissamut aarlerineq: Suli sivisuumik atuussinnaavoq

Covid-19-imut akiuussusersuinerit piffissami matumani aallartinneqaraluartut, ulluinnaat sungiusimasavut erngerluni atuuteqqilissanngillat. Tunngaviusumik qanorpiaq pisoqarumaarnersoq naluarput, nakorsaaneq Henrik L. Hansen, coronap atuunnera pillugu AG-mit apersugarput, taama isummerpoq.

Nunatta Nakorsaanerata Henrik L. Hansenip allaffianiippugut Nunatta Nakorsaaneqarfiani, Namminersorlutik Oqartussat allaffeqarfissuata akiatungaani siornatigut Amerikamiut sinniisoqarfigisimasaani.

Tallimanngornermi ualilluarneraniippugut. Henrik L. Hansen aamma nakorsaq Paneeraq Noahsen, inuiaqatigiinni nakorsaaserinermi immikkut ilinniagaqaleruttortoq aviisimi AG-mit tusagassiortup issiaqatigai.

Taakkua marluullutik ulapputeqaraluaqalutik aviisimit AG-mit apersorneqarsinnaanissaminnut akuersisimapput, taamaalillutillu aamma naqissuserpaat corona pititsilermalli nakorsaaneqarfiup tusagasseerusuttuaannarnikuunera.

Apersorneqarnerisa ataasinngornerani covid-19-imut akiuussutissamik kapuuineq aallartinneqarnikuuvoq. Siullermik Nuummi aqaguanilu Ilulissani. Nuummi Ippiarsummi najugaqartoq, 79-inik ukiulik Sofie Hegelund, inuppassuarnit malinnaavigineqarluni nunatsinni siullersaalluni akiuussutissamik Pfizer/BioNTech-imeersumit kapineqarpoq.

Sapaatip akunneralu suli naanngitsoq inuit 1305-it illoqarfinni taakkunani marlunni akiuussutissamik kapineqareersimapput.

Akiuussutissanillu Pfizer/BioNTech-imeersunik nutaanik Danmarkimit sapaatip akunnerani kingullermi tikittoqarneratigut Qaqortoq, Sisimiut aamma Aasiaat tullinnguunneqartussanngorput.

Tassani innuttaasut sanngiinnerusut aamma utoqqaat illuini peqqinnissaqarfinnilu sulisut akiuussutissamik kapineqarnissaminnut neqeroorfigineqassapput. Taamaakkaluartorli suli nalunarpoq inuttaasut 16-inik ukioqalereersimasut tamarmik, naartusut milutsitsisullu minillugit, akiuussutissamik kapineqarnissaminnut qaqugu neqeroorfigineqassanersut.

- Maannakkut suli tamanna erseqqissumik oqaatigisinnaanngilarput, sulimi naluarput akiuussutissanik qanoq sukkatigisumik Kalaallit Nunaannut tikiussuisoqassanersoq. Tamanna kialluunniit maannakkut akisinnaanngilaa. Kisianni akiuussutissanik amerlanerusunik upernaap ingerlanerani tikittoqartalerumaartoq neriuutigaarput. Ingasammik akiuussutissanik illoqarfinni aamma nunaqarfinni mikinerusuni atorsinnaasatsinnik, Henrik L. Hansenip akiuussutissaq Modernameersoq assartorneqarnissaminut aamma inaalikkallarneqarnissaminut ajornannginnerusoq, innersuussutigalugu taama oqarpoq.

Aviisimi AG-mi allaaserisaq tamaat atuarsinnaavat. Aviisi uani pissarsiariuk:

Powered by Labrador CMS