Peqqinnissaqarfik: Akiuussutissaq pillugu uagutsinnut sianerasi

Peqqinnissaqarfiup akiuussutissamik kapitinnissamik kissaateqarluni Peqqinnissaqarfik attavigineqannginnissaa innuttaasunut kaammattuutigaa. Innuttaasorpassuit utaqqisinnaanngillat, piaartumillu akiuussutisserneqarusupput.

Oqarasuaatitigut attaveqarniarneq ilungersunareersoq artukkerumanagu, innuttaasut akiuussutisserneqarumasut attaveqannginnissaat Peqqinnissaqarfiup innersuussutigaa, oqartussanit nalunaarfigineqarnissaq utaqqeqquneqarpoq.

Peqqinnissaqarfik akiuussusersuinermik suliaq pillugu killiffimmik nutaamik nalunaaruteqarpoq, taassumalu takutippaa, Nuummi utoqqaat navianartumiittut salliunneqartut akiuussutisserniarnerini suli naammassinissaq ungasittoq.

Akiuussutissat killeqartut
- Akiuussutissat killeqarmata kikkut siulliullutik akiuussutissinneqarnissaannut tulleriiaarisoqarpoq. Siullermik utoqaarnik paaqqutarinniffinniittut, utoqqaat, paaqqutarinniffinni Peqqinnissaqarfimmilu innuttaasunut toqqaannartumik sullissisut innuttaasullu immikkut ittunik nappaateqartut, Peqqinnissaqarfiup pisortaa, Joanis Erik Køtlum, taama oqarpoq.

Akiuussutissamut apeqqusiineq isummamut pitsaanerujussuarmut saassimasoq, taassuma ilanngullugu oqaatigaa.

- Piffissami kingullermi innuttaasut akiuussutissinneqarnissamik kissaateqartut innuttaasullu aallaqqaammut naaggaaraluarsinnarlutik isummaminnik allannguisut Peqqinnissaqarfimmut saaffiginnittut amerlapput. Tamanna assut pitsaasutut isigaarput, taanna tusagassiuutinut nalunaarummi taama oqaluttuarpoq.

Nassiussinermi kingullermi illoqarfiit akornanni agguaaneq imaappoq, Ilulissanut 402-t aamma Nuummut 903-t.

- Peqqinnissaqarfimmi sulisut innuttaasullu COVID 19-mut akiuussutissinneqarnissamik neqeroorummut akuersinerat nuannaarutigaarput. Tamanna coronavirusimut akiuunniarnitta immikkoortuisa naggataanni ilungersuuteqarnissamut sillimmarterluarsimanitsinnik isumaqarpoq, Joanis Erik Køtlum oqarpoq.

Kommunit ikiuupput
- Akiuussutissiineq pillugu kommuninik suleqateqarnerput qujamasuutigaarputtaaq. Kommunit ininik, angallassinernik sulisunillu atugassiipput. Tamanna akiuussutissiinerup piumasaqaatitaqaqisup naammasisinnaanissaanut ikiuunneruvoq annertoqisoq, Peqqinnissaqarfimmi pisortaq oqarpoq.

Eqimattat qulaani pineqartut akiuussutisserniarneqarnerini nassiussani siullerni, peqqinnissaqarfik ingammik Nuummi suli naammassinngilaq. Innuttaasut suli akiuussitissinneqanngitsut akiuussutissat nutaat tikippata akiuussutissinneqassasut ilisimatitsissutigineqarpoq.

- Tamatuma qaqugu pinissaa maannamuugallartoq ajoraluartumik oqaatigisinnaanngilarput, taamaattorli sap. akunnerini tulliuttuni qaninnerni pinissaa naatsorsuutigaarput. Ullulerneqarpat innuttaasut tamanna pillugu tusagassiuutitigut paasisutissinneqarnissaq naatsorsuutigisinnaavaat, Joanis Erik Køtlum, tusagassiuutinut nalunaarut naapertorlugu taama oqarpoq.

Powered by Labrador CMS