Meeqqat Illersuisuat atorfimminut qinnuteqaqqilerpoq
Meeqqat Illersuisuannik ukiunut sisamanut tullernut atorfinittussamik inuttassarsiorneq Namminersorlutik Oqartussanit saqqummiunneqaqqammerpoq. Aviâja Egede Lynge atorfimminut qinnuteqaqqissaaq.
Namminersorlutik Oqartussat meeqqat illersuisuannik inuttassarsiuussilerput.
Meeqqat Illersuisuat, Aviâja Egede Lynge qulanngilaq:
- Qinnuteqaqqissaanga, Sermitsiaq.AG-mit aperineqarami akivoq.
Aviâja Egede Lynge junimi 2015-imili meeqqat illersuisuattut atorfeqarpoq. Ukiut tallimat kingulliit nunatsinni meeqqat atugaat paasiniaaffigalugit angalasarsimavoq.
- Ukiuni tallimani kingullerni nuna tamakkingajallugu innuttaasut oqaloqatiginerani ilisimalikkagut annertuut maanna atorluarnissaanut piareerama. Taannalu suliaq naammasseqqaarusuppara ingerlariaqqinnginninni, Aviâja Egede Lynge Sermitsiaq.AG-mut oqarpoq.
Meeqqat Illersuisuat pillugu Inatsisartut inatsisaat siulleq naapertorlugu meeqqat illersuisuat ukiuni pingasuni atuuffeqartarpoq. Inatsisilli allanngortinneratigut atuuffik ukiunut sisamanut sivitsorneqarpoq.
Oqallorissumik ujaasisoqartoq
Atorfimmik inuttassarsiuussinermi Namminersorlutik Oqartussat allapput ”Kalaallit Nunaanni meeqqat tamarmik sinniisussaannik oqallorissumik" ujaasillutik.
Meeqqat illersuisuattut atorfimmut qinnuteqartunut naatsorsuutigineqarput:
- atorfiup imarisaanut naleqquttumik ilinniagaqartuusoq misilittagaqarlunilu
- attaveqatiginnillaqqissoq, aammalu meeqqanik oqaloqateqarsinnaanermik piginnaasalik
- aqutsisutut pilersaarusiornermik suleqateqarnikkullu misilittagalik
- namminersorluni sulisinnaalluartoq, eqinnaatsoq sulianillu aallussilluartoq
- akisussaassuseqarluartoq suliamullu ataqqinnittoq
- kalaallisut, nunat avannarliit oqaasiinik tuluttullu oqaatsinik piginnaasaqarluartoq
- isumassarsiullaqqissoq, ilakkuminartoq alapernaatsorlu
Atorfik pillugu uani atuarnerusinnaavutit.