Uummannaq: Tunillaassuuttoqarpasinngilaq

Uummannami tunillatsissimasumut qanillisimasinnaasut tamarmik arfininngornermi 16. januar tamarmik misissortissimapput. Misissuinerit takutippaat nutaanik tunillatsissimasoqanngitsoq, nakorsaaneqarfik ilisimatitsivoq.

Uummannamiittut tunillatsissimasumut qanillivallaarsimasinnaasut tamarmik coronavirusimut arfininngornermi 16. januar misissortipput. Misissuinerit Ilulissani peqqinnissaqarfiup laboratoriani misissorneqarput. Paasinarsivorlu nutaanik tunillatsissimasoqanngitsoq.

Nunatta nakorsaaneqarfia tusagassiorfinnut nalunaaruteqarluni allappoq.

- Tassalu tuniluuttoqarneranut takussutissaqanngilaq. Tunillatsissimasoq Uummannamiit aallareerpoq, nunatta nakorsaaneqarfia ilisimatitsivoq.

Nunatta nakorsaanera Henrik L. Hansen Sermitsiaq.AG-mut ilisimatitsivoq tunillatsissimasoq Ilulissani napparsimmavimmiitinneqartoq. Tunillatsissimasoq nuunneqarsimavoq, pinartuuneranillu tunngaveqarani.

Uummannami suli angerlarsimaqqusaaginnarallartoqartoq

Nakorsaaneqarfik ilisimatitsivoq Uummannami innuttaasut ilaat suli angerlarsimaannarallassasut, misissorteqqikkumaartullu.

- Tunillatsiffiusinnaasumik qanillisaqarnermiit ullut ikinnerpaamik arfineq marluk qaangiuppata aatsaat tunillatsissimannginneq naammaginartumik qulakkeerneqarsinnaavoq. Taamaattumik suli tunillatsissimasunik paasisaqarnissaq annikitsumik ilimanaateqarpoq, taamaattumillu kikkut tamarmik Covid-19-imut ersiuteqartoqalernissaa eqqumaffigisariaqarpaat.

Sapaatit akunneranni tulliuttumi inuppassuit Kalaallit Nunaannut tikittussaapput. Tamanna pissutigalugu nuna tamakkerlugu tunillaasinnaasunik tikittoqarnissaa ilimanaateqartorujussuuvoq. Taamaattumik tunillaasinnaaneq Uummannamiinnaq pissanngilaq.

- Unammilligassaq alla tassaavoq, Covid-19 Tuluit Nunaanneersoq, Danmarkimi sukkasuumik tuniluutilersoq nutaaq tunillaatianerujussuarlu. Taamaattumik Kalaallit Nunaannut tikittoqassanngitsoq oqaatigineqarsinnaanngilaq. Kikkut tamaasa piffissami aggersumi innersuussutinik malinnilluaqqullugit, aammalu tusatsiakkanik ingerlatitseqqittarnermi peqataaqqunagit kaammattorneqarput, tusagassiorfinnut nalunaarut naggaserneqarpoq.

Powered by Labrador CMS