Ullut 25-it kinguaattoortaartoq: Naammagittarnarunnaavippoq
Petrine Karlsen Upernaviup eqqaani Kullorsuarneersoq, Kullorsuarmut angerlassalluni ullut 25-it kinguaattoortaarnermik misigisaqarpoq. Meeqqani marluk ilagalugit Upernavimmi juullisiortariaqarsimavoq.
Petrine Karlsenip meeqqanilu marluk Upernaviup eqqaani Kullorsuarmut aallarnissaminut qulimiguullip piareernissaa utaqqivaa. Nukarleq marlunnik ukioqarpoq, aappaalu sisamanik ukioqarluni.
Ulluni 25-ini aallarnissaminnut kinguaattoortaarsimapput.
- Aallarfissarput allaqqagaluarpoq 22. december. Aallarnissarput arlaleriarluni taamaatiinnarneqartarpoq. Maanna qulimiguulik utaqqivarput, neriuppungalu ullumi angerlamut tikissinnaassalluta, Petrine Karlsen Sermitsiaq.AG-mut arfiningornerup ullaap tungaani oqaluttuarpoq.
Taanna Ikerasannut novemberimi aallarsimavoq, juullertinnaguli Kullorsuarmut aallarsimagaluarluni.
Upernavimmi juullisiortut
Upernavimmi eqqaanilu ukiukkut angalaniarneq kipiluttunarsinnaasarpoq. Ukiuunerani kaperlatsillugu, pingaartumik qaammatini november, december aamma januar, taarnerpaaffimmiitillugu angallanneq unittuungajassinnaasarpoq.
- Sapaatit akunneri siulliit naammagittarpunga. Ullulli uku kingulliit naammagittarfeerunnera malugisinnaavara. Meeqqakka marluk aamma uninnganermut qasupput, angerlamut apuunnissaq qilanaarnarsivoq, Petrine Karlsen oqaluttuarpoq.
Taanna atsiornernik katersisunut atsioqataasimavoq. Avannaani qulimiguulimmik angallanniarnerup pitsaanerulernissaa pillugu atsiornernik katersisoqarpoq.
Kiffartuussinissamut isumaqatigiissut nutaaq isumalluarnartoq
Air Greenland ilisimatitsivoq Upernaviup eqqaani piffissami kingullermi sila pissutaalluni angallassiniarnermi unammillernartoqarsimasoq. Angalasut kingulliit apuutissallugit Air Greenland maanna sulingasuarpoq.
Kiffartuussinissamulli isumaqatigiissutit nutaat isumalluarnartoqarput:
- Kiffartuussinissamut isumaqatigiissutit nutaat 2021-20-mut atuuttussat oqartussanut isumaqatigiissutigineqartut naapertorlugit qulimiguullit nutaaliaasut H155-it Bell212-inut taarsiutaassapput, Air Greenland ilisimatitsivoq.
- Qulimiguullit nutaaliaanernik taarserneqarnissaat neriulluarnarpoq. Neriunnarpoq arlaannaalluunniit taama sivisutigisumik kinguaattooqqissanngitsoq, Petrine Karlsen oqarpoq.