Aaja: Angerlarsimaffeqanngitsuuneq aaqqiiffigineqassappat suleqatigiittoqartariaqarpoq
Aaja Chemnitz Larsenip kalaallit Danmarkimi Kalaallillu Nunaanni angerlarsimaffeqanngitsut amerliartuinnarnerat aaqqiiffiginiarlugu suleqatigiittoqarnissaa Danmarkimi Ministeriunermut kaammattuutigaa.
Inuit Danmarkimut nuuttartut danskit aaqqissuussaanerat amerlasuutigut paasiuminaatsittarpaat, amerlasuutigullu kalaallit Danmarkimi suliffeqaratik ajutuuinnginnissaminnullu sillimmateqaratik aqqusiniinnarmi inuulersarput.
Tamanna Kofoeds Skolep Kalaallit Nunaata Danmarkillu akornanni nuuttoqartillugu sooq ajutoortukulasoqartarnera pillugu misissuisimanerata takutippaa.
Folketingimi ilaasortap Aaja Chemnitz Larsenip (IA) sapaatip akunnerani matumani Ministeriunermik Mette Frederiksenimik (S) ataatsimeeqateqarnermi siunnersuutigaa, angerlarsimaffeqanngitsuuneq aaqqiiffiginiarlugu Naalakkersuisut Danmarkimilu naalakkersuisut suleqatigiissasut.
- Amerlasuut suliffissarsinissaminnut inissaminnilluunniit pissarsinissaminnut attaveqaateqanngillat imaluunniit danskit aaqqissuussaanerannik ilisimasaqanngillat. Ataatsimeeqatigiinnitsinni Ministeriunermut Mette Frederiksenimut oqariartuutigaara suleqatigiinnerusariaqartugut, Aaja Chemnitz Larsen Sermitisaq.AG-mut oqarpoq.
Amerliartuinnartut
Danmarkimi angerlarsimaffeqanngitsut ikiliartortut, 2013-imili angerlarsimaffeqanngitsut Kalaallit Nunaanneersut nalunaarsorneqartalermatali kalaallit angerlarsimaffeqanngitsut amerliartuinnavissimavpput.
- Angerlarsimaffeqanngitsuuneq initusiartuinnarpoq – maani nuntatsinni Danmarkimilu. Kommunit arlallit unnuisarfinnik ulikkaapallattartunik pilersitsisarput. Unnuisarfiit pisariaqartinneqarput, sulili aaqqiissutaagallarneruinnarlutik. Taamatut ingerlasoqarnera ajortup tungaanut ingerlanervoq, isumaqarpungalu nunatta killeqarfii akimorlugit suleqatigiinnissaq aaqqiissutaassasoq, Aaja Chemnitz Larsen oqarpoq.
- Meeqqat atugarliortut pillugu suleqatigiissinnaanerput takutereerparput, angerlarsimaffeqanngitsullu amerliartuinnarnerat ataatsimoorluta aamma aaqqiiffigisinnaasariaqarparput, taanna nangilluni oqarpoq.
Suliffmmit ineqartitaaneq ajortortaqartoq
Folketingimi politikkerip oqaatigaa, assersuutigalugu Kalaallit Nunaanni inissaaleqisoqarnerani nuunneq ajornaatsumik aaqqiipallannerungaangat ajutoortoqakulanerusartoq.
- Inuppassuit oqartussat isumannaallisaasutut ikiorsiisariaqaraluartut ajutoorfigisarpaat. Pingaartumik ineqarnermut tunngatillugu politikkerput ajutoorsimavarput. Suliffimmut atatillu ineqartitaasarneq nalinginnaasuuvoq. Suliffimmulli atatillugu ineqartitaasarnerup ajortortaa tassaavoq, suliffeerukkuit aamma inigisat qimattariaqassavat. Inuppassuit isertitaarukkaangamik angerlarsimaffeerukkaangamillu pitsaanerusumik inuuneqalernissartik neriuutigalugu Danmarkimut siumuinnaq bilitsisisarput. Tamamnnali ajoraluartumik tamatigut pitsaasumik aaqqiissutaaneq ajorpoq, Aaja Chemnitz Larsen oqarpoq.
- Nalunaarusiap saqqummersinneqaqqammersup - Kalaallit Nunaanniit aqqusinermut - iliuuseqartariaqarnitsinnik paasitippaatigut, taamalu nunatsinni Danmarkimilu aamma naalakkersuisuutitatta akornanni angerlarsimaffeqanngitsuuneq pillugu suliniutaat nukittorsarniarlugit isumassarsiorfigisinnaallutigu, taanna naggasiilluni oqarpoq.