Avannaani borgmesteri: Immitsinnut paarinissarput pisariaqarluinnarpoq

Avannaata Kommuniani borgmester, Palle Jerimiassen (S) innuttaasut imminnut paarilluassasut kaammattuutigaa. Peqqinnissaqarfimmi sulisoq Danmarkimiit Uummannamut tikereernerminit misissortinnermini coronavirusimik tunillatsissimasoq ippassaq paasineqarpoq.

Kommunip facebookimi quppernerani borgmesterip nassuiarpaa pissutsit aqqusaarneqartut qanoq kinguneqarnersut:

- Avannaata kommuniani innuttaasunut aaqqissuussinerit kommunimit ingerlanneqartussat inassutingaarput suli ulluni tulliuttuni uninngatinneqassasut, aamma Uummannami utoqqaat illuanut pulaartoqarsinnaajunnaarallarpoq, Palle Jerimiassen videomi immiussami taama oqarpoq.

Tunillaassortitsinaveersaarput

Peqqinnissaqarfimmi sulisoq, Uummannamut tikittoq, nunatsinnut tikinnerminit ullut arfineq-marluk qaangiunneranni misissortikkami coronavirusimik tunillatsissimalluni paasivaa. Angalasimasoq tikinnerminit mattusimaqqaarsimanersoq, imaluunniit oqartussanit angerlarsimaqqaartussanngitsutut immikkut akuersissuteqarsimanersoq suli ilisimatitsissutigineqanngilaq.

Kommunip corona pillugu aqutsisoqarfik qanimut suleqatigigaa, Uummannamilu tunillaassortoqalinnginnissaa anguniarlugu oqartussanit iliuuseqartoqartoq, borgmester ilisimatitsivoq.

- Immitsinnut paarinissarput minnerunngitsumillu sissuernissarput pisariaqarluinnarpoq. Danmarkimi massakkut coronap tuniluunnera annertoorujussuuvoq, angallanneq annertooq piffissami aggersumi ingerlanneqartussaavoq, taamaattumik innuttaasut saaffigissavassi nunatta nakorsaanerata inassutaat sukumiisumik maleqqullungit, oqarpoq.

Uku innersuussutigineqarput:

• Ungasissutsinut innersuussutit malinneqassapput, inuit imminnut qanippallaarnaveersaassapput.
• Inassutit naapertorlungit talinnut quersortassuutit imaluunnit tangajortassuutit.
• Assatit asakulakkit imaluunnit spriti atoruk.
• Napparsimanermik ersiuteqaruit angerlarsimaannarit.

Video tamaat uani takuuk: