Aningaasaqarnermut Ataatsimiititaliap akiitsunik appartitsiniaaneq itigartitsissutigigaa

Naalakkersuisut Mittarfeqarfiit akiitsui appartinniarlugit Sanaartornermut Iluarsaassinermullu Aningaasaateqarfimmit 90 millioner koruunit nuunneqarnissat pillugu Aningaasaqarnermut Akileraartarnermullu Ataatsimiititaliamut qinnuteqarsimapput.

Missingersuutinut sunniuteqanngitsumik ilassutitut aningaasaliissutissat pineqaraluarpataluunniit Aningaasaqarnermut Akileraartarnermullu Ataatsimiititaliami ilaasortat Naalakkersuisut qinnuteqaataannik itigartitsisimapput.

Ataatsimiititaliap decembarip 17-iani ataatsimiissimaneranit imaqarniliami naatsumik ima allassimasoqarpoq:

Siunertamut naapertuutinngitsoq

- Ataatsimiititaliap isumaa malillugu nuussinissaq sanaartornermut aningaasaateqarfimmik siunertaasumut naapertuutinngilaq.

Taamaammat itigartitsissutigineqarnissaa inassutigineqarpoq.

Naalakkersuisut aamma 10 millioner koruunit Sanaartornermut Iluarsaassinermullu Aningaasaateqarfimmit kontumut, piffissaq ungasinnerusoq eqqarsaatigalugu aningaasaliissuteqarnissamik pisariaqartitsilernissamut attuumassuteqartumut nuussiniarnertik iluatsinngitsoorpaat, aningaasat pineqartut timmisartoqarfiliornermut timmisartoqarfiullu atortuinut, tassunga ilanngullugit illutassanut, mittarfinnut kiisalu isumannaallisaanermi atortunut atugassanngortitaapput. Taakkununnga ukiut arlallit ingerlaneranni ukiumut 10 millioner koruunit immikkoortitassanngortinneqareersimapput, taakkulu naammassimarpasinngitsutut isikkoqarput.

Piffissamut ungasissumut pilersaarut

Aningaasaqarnermut Akileraartarnermullu Ataatsimiititaliami Naalakkersuisut kaammattorneqarput aningaasaliinissamut periarfissamik allamik nassaarniaqqullugit.

- Aamma Mittarfeqarfiit aningaasaqarniarnerat eqqarsaatigalugu siumut ungasissumut isigisumik pilersaarummik imaqartumik nassaarniaqqullugit, ataatsimiititaliamit oqaatigineqarpoq.