Nakorsaaneq Aasiammiunut: Kaffellernissamut maannakkut piffissaanngilaq

Angerlarsimaannarallartussanngortinneqartut amerlanerit coronavirusimut misissortikkamik tunillatsissimanngitsut paasineqarpoq. Aasiannili suli tunillatsissimasoqarsinnaavoq.

Aasianniittut tamarmik sapaatip akunnerini tulliuttuni mianersoqquneqarput. Nakorsaaneq Aasiammiunut toqqaannartumik taama nalunaaruteqarluni allappoq.

- Illoqarfimmi suli tunillatsisimasoqarsinnaavoq. Kikkut tamaasa qanillinaveersaarsigit aamma assamiinaveersaaritsi imaluunniit "eqitaarinaveersaaritsi", Henrik L. Hansen tusagassiorfinnut nalunaaruteqarluni allappoq.

- Nuannannissamut, ataatsimoornissamut, kaffisortitsinissamut
allatulluunniit aaqqissuussinissamut piffissaanngilaq, taakkunanimi inuit allat
ataatsimooqatigineqartarput. Pisiniarfinni allanilu naapiffigisartakkassinni immissinnut
qanillinaveersaaritsi.

Borgmesteri aamma kaammattuivoq

Borgmester Ane Hansen innuttaasunut aamma kaammattuivoq kaffellertoqarpallaaqqunagu.

- Tamakku minnerpaaffimmiitinnissaat kissaatiginarpoq. Peqatigiiffiit aaqqissuussisartullu, soorlu timersortarfimmi sammisassaqartitsisartut bingortitsisartulluunniit aamma kaammattorusuppakka mianersornitsinni akisussaaqataaqqullugit, Ane Hansen oqarpoq nangillunilu:

- Assersuutigalugu ullumi paasivara timersoqatigiit ilaat timersortarfimmi aaqqissuussinissaraluaminnik taamaatitsiinnarsimasut, tamannalu qujaruppara, toqqissiallaatigigakku, Kommune Qeqertaliup Facebookiani nalunaaquteqarnermini oqarpoq.

Misissortinnermi tunillatsissimanngitsut

Aasianni innuttaasoq ataaseq COVID-19-imik tunillatsissimasoq pingasunngormat paasineqarpoq. Tunillatsissimasoq Danmarkimeereernermini tikinnermit ullut tallimassaanni misissortimmat, tunillatsissimasoq paasineqarpoq. Paasineqarlunilu angerlarsimalluni mattusimaannarallarnissamut malittarisassanik malinnissimanngitsoq. Aasianni innuttaasut allat ikinnerpaamik qulit tamassuma kingorna angerlarsimaannarallartussanngortinneqarput, soorlu aamma kommunimiit Nuummut ataatsimiigiartut, Inatsisartunilu aningaasaqarnermut ataatsimiititaliami ilaasortat Nuummi aamma mattusimagallartussanngortinneqarsimasut.

Nakorsaanerup ilisimatitsissutigaa angerlarsimaannarallartut amerlanersaat covid-19-imut tallimanngormat misissortissimasut. Misissortissimasullu tamarmik tunillatsissimanngitsut paasineqartoq. Tunillatsissimannginnamik maanna angerlarsimaffimminniit anisinnaalersut, nakorsaanerup ilisimatitsissutigaa. Taama nalunaaruteqarneq borgmester Ane Hansenip toqqissiallaatigaa.

- Taamaalilluta allamik tunillaasuisoqarsimanersoq massakkut ilisimasaqanngilagut. Taamaattorli nalusatsinnik tunillaassuisoqarsimasinnaavoq, nakorsaaneq ilisimatitsivoq.

- Kikkut tamarmik sapaatip akunnerini tulliuttuni mianersorsimassappata Aasianni
tuniluunnissaagaluaq pinngitsoortinneqarsinnaassaaq!

- Taamaattumik kikkut tamarmik peqqinnissaqarfimmit siunnersuutinut malinninnissaat pingaaruteqarluinnarpoq, Henrik L. Hansen oqarpoq.

Nakorsaanerup ilanngullugu ilisimatitsissutigaa Nuummi tunillaassortoqarnissaanik suli aarlerinartoqartoq. Tunillatsinnermiimmi tunillaalernissamut ullualuit ingerlaqqaarsinnaasarput, misissortinnermilu siullermi tamanna takuneqarsinnaasarnani. Taamaammat innuttaasut mianersoqquneqarput. Tunillaassortoqarsinnaanerlu pillugut politiinit attavigineqarsimasut suli maanna mianersorluarnissaat kaammattuutigineqarluni.

Kikkulluunniit covid-19-imut ersiuteqartut peqqinnissaqarfimmut sianeqquneqarput. COVID-19-imik tunillatsissimasut qanoq ersiuteqartarnersut pillugit uani atuarnerusinnaavutit.

Powered by Labrador CMS