Gå til hovedindhold

Aningaasanut missingersuut isumaqatigiissutigineqarpoq: Sermersuup ineqarneq ukkatareqqilerpaa

Partiit isumaqatigiissuteqartut aningaasanut missingersuummut isumaqatigiipput inissialiortiterneq ukkatarineqassasoq, ilaqutariit sanngiinnerusut tapersersorneqarnerussasut sukisaarsartarfiillu ukiuni tullerni aamma inerisarneqassasut.

Inuit Ataqatigiit, Demokraatit Suleqatigiissitsisullu isumaqatigiillutik Kommuneqarfik Sermersuup 2021-mi aningaasaqarnikkut missingersuutaa atsioqatigiiffigaat. Kommuneqarfik Sermersooq tusagassiutinut taama nalunaaruteqarpoq. Isumaqatiginninniarnerit tallimanngornermi 23. oktober naammassineqarput, isumaqatigiissullu atsiorneqarluni.

- Assorsuaq nuannaarutigivara uagut - partiit isumaqatigiissuteqartut akunnitsinni - 2021-mut missingersuutissanik isumaqatigiissuteqarsinnaagatta. Partiit tamarmik suliniutiminnik aamma isumaqatiginninniarnermi ataatsimoortumik aaqqiissuteqarniarnermut piumassuseqarnerat pillugu qutsavigineqassapput, borgmesteri Charlotte Ludvigsen (IA) oqarpoq.

Kommunip aningaasaqarnera

Kommuneqarfik Sermersuup naatsorsuutigaa 2021 60 milliuunit koruuninik sinneqartoorfiussasoq. Innuttaasut naatsorsuutigissavaat kommunimut akileraarut nikissanngitsoq. Kommunip saniatigut ingerlatsinermut 2 milliardit koruunit missingersuutigai, sanaartugassanullu 300 millionit koruunit missingersuutigalugit.

Inissaaleqineq ukiuni kingullerni kommunimit unamminartarsimavoq. Ukiunilu tullerni inissaqartitsiniarnermut kommuni ilungersuuteqaqqissaaq. Ukiuni tullerni arfinilinni inissiat katillugit 1.850-it sanaartorneqassasut, partiit isumaqatigiittut atsioqataaffigaat. Agguaqatigiissillugu ukiumut inissiat 308-t sanaartorneqartussanngorput. Ukiuni sisamani kingullerni inissiat 400-t sinnillit kommunimit sanaartorneqarsimapput.

- Nammineq ineqarneq inuup pisinnaatitaaffigigaa isumaqatigiissuteqartut isumaqarput. Illoqarfiillu pingaarnersaanni kommunimi kommunalbestyrelsemut ilaasortatut qinikkatullu akisussaassuseqartutut sinaakkusiissalluta akisussaaffigaarput, missingersuutinut isumaqatigiissummi allassimavoq.

Kultoori aamma inerisassaaq

Kommunip kultoorilerineq sunngiffimmilu sammisaqartitsisarneq inerisassallugu aamma aalajangiussaqarpoq. Suliniutit arlallit aallartinneqassapput.

- laatigut Nuummi Illorsuaq Timersortarfik, siunissami multihusinngortinneqartussaq, ilaqutariinnut, timersortartunut aamma nammineq piumassutsiminnik ingerlataqartut inissisimaffigisinnaasaat allilerlugu aallartinneqassaaq, nalunaarutigineqarpoq.

Nuummi Arctic Parkiliortoqarnissaanut aamma aningaasaliisoqarnissaanut isumaqatigiittoqarpoq. Sisorartartunut majuartaat nutaaq, qamuteralannut ingerlaarfiit, mountainbikertartunut ingerlaarfiit aqqusineeqqallu Quassussuup Kuanninnguillu akornanni pilersinneqassapput. 

Ilaqutariit tapersersorneqassapput

Ilaqutariit sanngiinnerusut aamma tapersersorumallugit partiit isumaqatigiittut isumaqatigiissuteqarput. Partiit isumaqatigiissuteqartut ilaqutariinnut tunngasunik suliniutit pitsanngorsarneqarnissaat aalajangiuppaat.

- Partiit isumaqatigiissuteqartunit Tasiilami meeqqap-anaanap illuata ingerlanneqarneranut 3,15 mio. koruunit immikkoortinneqassasut isumaqatigiissutigineqarpoq. Taakku saniatigut partiit isumaqatigiissuteqartunit 3,4 mio. koruunit Tasiilami Ungecenterimik inunnut suliniutinik meeqqanut inuusuttunullu immikkut pisariaqartitsisunut tunngasunik katersuisussamik pilersitsinissamut  atorneqassapput. 

Pilersaarut kingorna Paamiunut allineqarsinnaanngorlugu misiligutitut pilersinneqassaaq.

Missingersuutinik isumaqatigiissuteqarneq Kommunalbestyrelsip ataatsimiinnissaani tulliani ulloq 24. novembarimi pisussami aamma saqqummiunneqassaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER