Nuussuarmi sinnattugaq piviusunngortoq

Aalisakkanut suliffissuaq nutaaq qaammatip tulliani ammarpat suliffissat nutaat pilersinneqassapput, ukiorlu kaajallallugu qaleralinnik tunisassiortoqarsinnaalissalluni.

Nuussuarmi aalisakkanut suliffissuaq nutaaq 500 tonsit missaanni qerisunik uninngaasuuteqarsinnaavoq, ullormullu 16 tonsit tunisassiarneqarsinnaallutik. Ukiuunerani inuit 15-init missaat, ulapinnerpaaffimmilu holdit marluk, tassa inuit 30-it missaat, sulisorineqarsiinnaasut naatsorsuutigineqarpoq.

Nuussuarmi aalisakkanut suliffissuarmi mikisumi nutaanngilisimasumilu ukiorpassuarni tunitsiveqarnikkut ajornartorsiortoqareertorlu, ajornartorsiutit tamakku qaammatip ataatsip missaa qaangiuppat, aalisakkanut suliffissuaq nutaarluinnaq nutaaliaasorlu ammarneqarpat, oqaluttaannanngussasut, Arctic Fish Greenland A/S-ip pisortaa, Frederik Olsen oqarpoq.

Aviisi Sermitsiaq taama allappoq.

Aalisakkanut suliffissuaq Royal Greenland A/S-ip suliffeqarfiutaanit Arctic Fish Greenland A/S-imit, Kullorsuarmi Nuussuarmilu tunitsiveqarnikkut ingerlatsisuusumit, pigineqarpoq.

Nuussuarmi 180-it misssaanik inoqartumi, aalisartut piniartullu peqatigiiffiat aamma nunaqarfimmi aqutsisut, ukiut ingerlaneranni tunitsiveqarnikkut aaqqissuuteqartoqarnissaannik nilliaatigisarsimatik, kiisami tusaaniarneqalersimasut misigisimapput. Aalisakkanik suliffissuaq nutaaq atuutilerpat, tunitsiveqarnikkut pissutsit pitsaanerulissapput suliffissallu nutaat aalisartukkormiunit pisariaqartinneqaqisut aatsaat taamak amerlatigisut pilersinneqarlutik. Aalisakkanut suliffissuarmi nutaanngitsumi tunisassiarineqarsinnaasut killeqarpallaarneri pissutaalluni, tunisineq tunisassiornerlu ukiumut qaammatit sisamat missaanni matoqqatinneqartariaqartarsimavoq.

Aviisimi Sermitsiami, uani pisiarisinnaasarni, atuarnerusinnaavutit:

Powered by Labrador CMS