Kim Kielsen Siumumi siulittaasunngorniaqqinnissaminut piareersarpoq
Qaammat sinnilaaginnarlugu qaangiuppat Siumup ataatsimeersuassaaq, partiillu siulittaasua, ilisimaneqartutut siulittaasutut ingerlaqqikkumalluni sassartoq maanna piareersaleruttorpoq.
Siumup siulittaasua ataasinngormat Sermitsiamit apersussallugu naapitarput nukissaalatseqqajarpasinngilaq siunertaminillu annikilliliisimaqqajarpasinngilaq. Paarlattuanilli tusaamaneqaatini, tassalu ajornartoornernik nalaataqaraangami aniguiniallaqqissuunini aammalu nukittuumik inisseqqittarnini soorluuna matumani aamma uppernarsaannaraa.
Aviisi Sermitsiaq taama allappoq.
Malunnarpormi aatsaat taamak partiiminut siuttooqqinnissamik nunallu aqunneqarnerani aquummik nangittumik tigumminninnissamik nukissaqarluarpasippoq:
- Piffissami sivitsortumi politikkimut attuumassuteqanngitsut pillugit ukkatarinninneq annertoorujussuunikuuvoq, allaat aarleqqutigaara innuttaasunut ersarlutsinneqalersimasinnaasoq piffissami partiinnut aammalumi Naalakkersuisunut siulittaasuuninni angusarisimasagut suunersut. Taamaammat assut qilanaarpunga tunuliaquttavut isaasigut isigalugit nassuiaanissannut, siuttuuninni partiip killiffia aammalu naalakkersuisooqatigisavut peqatigalugit maannamut angusimasagut ilaatigut apuutissagakkit. Aamma parteeqatikka sassarfigissallugit qilanaarpunga, tassami uannut sinnilimmik nukissaqarluarpunga siuttooqqinnissannullu piareersimalluarpunga, Kim Kielsen nunatsinni partiit annersaanni Siumumi siulittaasoq imminut tatigerpaseqaluni oqarpoq.
Nuna ilorraap tungaanut ingerlarsorpoq
Kim Kielsen taamatut oqarnermini aamma innersuussutigaa nammineq siuttuunermini nupap aningaasaqarnera patajaatsumik inerisarneqarsimasoq nukittorsarneqarlunilu, suliffissaaleqisut ikiliartorsimasut, amerlanerusut ilinniakkamik ingerlatsillutillu naammassinnittalersimasut, nunat tamalaat akornanni suleqatigiinneq niueqatigiinnerlu annertunerulersimasut aammalu Danmarkimik suleqateqarneq naligiinnerusumik aallaavilimmik qaninnerusumillu suleqatigineqalersimasoq.
- Pingaartumik piffissaq kingullermi sivitsortumik nukippassuit politikkimut attuumassuteqanngitsunut atortariaqarsimavagut, tamannalu partiitta iluani suleqatigiinnitsinnut annikigisassaanngitsumik mangiaasimavoq, aammalumi naalakkersuisooqatigiinnut sajuppillatsitsisimalluni. Pingaartumik illuatungiliuttut nukitik tamaasa atorlugit namminissarsiortuunerarlunga, kisermaasserpalaartuunerarlunga, sallutunerarlunga, aqutsisutut matoqqasuunerarlunga allaallu Inatsisartuni partiinut tusaajumanngitsuunerarlunga pasinarsarpaannga. Tamakkuli pasilliutit unnuakkut sinnarlutsinneq ajorpaannga, nalunngilarami pasilliinerit tusaamanerlutsitsiniaanerillu aqqutigalugit maannamut angusimasatsinnut ersernerlutsitsiniutaannaasut, Siumup siulittaasua aammalu Naalakkersuisut siulittaasuat, Kim Kielsen oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: