SAM-imi isumaqatigiinnginneq: Partiip atuineranut isornartorsiuisut ilaqqittut

Suleqatigiissitsisut siulersuisuini ilaasortaasimasut marluk siulittaasuugallartup Tillie Martinussenip partiip aningaasaatanik atuisimaneranik isornartorsiuinermut ilanngupput. Tillie Martinussernip attatiinnarpaa, siulersuisuunerit sunik tamanik akuersissuteqarsimanerat.

Suleqatigiissitsisunik pilersitseqataasimasup siusinnerukkullu siulersuisuunerni ilaasortaasimasup Henrik Philippseni partiip aningaasaataanik atuinissamut pingaarnersiuineq isumaqatiginngilluinnarpaa.

- Tillie Martinussenip siulersuisuunerillu iliuusaat isumaqatiginngilluinnarpara. Partiitta aningaasaqarnera pillugu ulluni kingullerni tusagassiorfitsigut sammineqarnerata kinguneranik uanga tapersersuisinnaanngilanga, taanna Sermitsiaq.AG-mut oqarpoq.

- Akileraartartut aningaasaataat ilaasortallu ilaasortaanerminnut akiliutigisartagaat atorlugit partiip akiliissutitut kortiata pinnersartinnernut, nerisassanik pisiaqartarnermut neriniartarfimmilu nerisimanermut akiliutitut atorneqartarneranut uppernarsaatit takusimavakka, taamaammat parteerput ilumini ajortissimavoq, taanna oqarpoq.

Maanna siulersuisuunerni ilaasortaasut pingasut tamarmiullutik Sermitsiaq.AG-mut erseqqissaatigisimavaat, maannakkut siulittaasuusoq Tilliie Martinussen tamakkiisumik tapersersorlugu, aningaasartuutaasimasullut tamaasa akuersissutigisimallugit.

Sooq tusagassiorfitsigut assortuusissaagut?

Siulittaasup siulersuisuni ilaasortaasimasut isornartorsiuinerat pakatsissutigaa.

- Inuit ukiumi ataatsimi ukiuniluunniit arlalinni partiimut ikiuutaasimanngitsut siulersuisuunernut saaffiginneqqaaratik taamatut isornartorsiuileriasaarnerat pakatsinarpoq, Tillie Martinussen oqarpoq.

Henrik Philippsenip erseqqissaatigaa, siulersuisuunerni issianermini taamatut aningaasartuutigineqarsimasut akuerisimanngisaannarlugit. Taamatut oqarnera siulersuisuunerni ilaasortaasimasumit allamit, Nivi Struntzimit taperserneqarpoq.

- Kiinnakkut taamatut suliaritinnerit akuerisimanavianngikkaluarpakka, akerlilerneqarsimasuuguma isummerfigisimassangaluarparput, taanna Sermitsiaq.AG-mut oqarpoq.

Malittarisassaliortoqarnissaanik siunnersuuteqarsimasoq

Taamatut pisoqarsinnaanera pinngitsoortinniarlugu siunnersuutigisimavaa, ilassinninnermi aningaasanik atuisarnissamut aamma partiip aningaasaataanik atuisarnissamut malittarisassaliortoqassasoq.

- Aningaasartuutissat sorliit allattoqarfimmit taamaallaat akuerineqartassanersut aamma aningaasartuutissat sorliit siulersuisuunerni akuerineqartassanersut pillugit malittarisassaliortoqarnissaa siunnersuutigisimavara. Tamannali angumerinngitsoorsimavarput, Nivi Struntz ukioq manna juunip qaammataani siulersuisuunerni tunuartoq oqarpoq.

Tillie Martinussen aalajangiussimallugu oqaatigaa, aningaasartuutaasimasut tamarmik partiimut attuumassuteqartut, isumaqarnerarlunilu isornartorsiuinermut tunngaviusoq inuit aningaasartuutaasimasunut tunngaviusunik ilisimasaqannginnerat.

- Soorunami aningaasartuutit partiip politikkikkut suliaqarneranut attuumassuteqarput aamma siulittaasup sulisullu timimikkut tarnimikkullu peqqiissuuginnarnissaannut attuumassuteqarlutik. Stressertitaasaqaagut, aamma siulittaasoq tassaavoq avammut tusagassiuutitigullu kiinnertartoq

Qanorluunnit ikkaluaraangami peqataasartoq

- Inersuarmi issiaqataanngikkuma, Suleqatigiissitsisut soqutigisaat isumagineqassanngillat. Minnerpaamik ulluni 14-ini napparsimatinnanga sinniisussamik aggersaasinnaanngilanga, malittarisassavut taamaapput, taamaammat qanorluunniit ajortigingaluaraangama peqataajuaannangajappunga, taanna oqarpoq.

Tillie Martinussenip nassuiaatigaa, ilaatigut pukutsukkut ajoquseriataarsimaneq pissutigalugu tagiartortittoqartartoq kiisalu Inatsiartut illorsuata oqoqarnera PCB-qarneralu pissutigalugit sapingaqarnermut atatillugu kinnakkut suliaritittoqarlunilu sapigaqarnermut nakorsaatitortoqartartoq.

- Tusagassiorfinnut ammalluinnartumik oqaaseqartarpugut. Isertuussassaqanngilavut. Isumaqarpunga partiit allat pisarnerat assiginngilluinnarlugu, naatsorsuutivut kikunnit tamanit takuneqarsinnaanngortittarlutigit, Tillie Martinussen oqarpoq.

Powered by Labrador CMS