Ataatsimiititaliaq: Piniartut sumik inuussuteqassagamik?
Qaanaami Ittoqqortoormiinilu qilalugartassat nungukkaangata, piniartut isertitaqarnissaminnut periarfissaaruttarput. Aalisarnermut, piniarnermut nunalerinermullu ataatsimiititaliami siulittaasoq maannakkorluinnaq iliuuseqartoqarnissaanik ujartuivoq.
Qaanaami Ittoqqortoormiinilu qilalugartassat nungukkaangata, piniartut allatigut isertitaqarnissamut periarfissaasuasarput, imminnullu pilersorniarnissaminnut ajornartorsiulertarlutik.
Aalisarnermut, piniarnermut nunalerinermullu ataatsimiititaliami siulittaasoq, taama ilisimatinneqarsimasoq, Henrik Fleischer, tusagassiorfinnut nalunaaruteqarluni taama allappoq.
- Qaanaami piniartut amminik suli tunisisinnaanngitsut ataatsimiititaliap paasivaa. Isertitaqarsinnaannginneq tamanna uggornartorujussuartut ajuusaarnartutullu ataatsimiititaliamit isigineqarpoq, ataatsimiititaliami siulittaasoq ilisimatitsivoq.
Taama nalunaaruteqarneq Qaanaami Atassutip immikkoortortaqarfiani siulittaasumit taperserneqarpoq- Immikkoortortaqarfiup siulittaasua, Marie Peary tusagassiorfinnut nalunaarutimini nassuiaavoq Qaanaami puisip neqaanik, amminik aalisakkanillu tingooraasinnaasumik tunitsiveqanngitsoq.
- Piniartut ilaquttatik namminerlu napatinniarunik, inigisaminnut, eqqaaveqarnermut kiassarnermut, innaallagiamut assigisaannullu aningaasartuuteqartariaqartut isertitsivissaqanngitsut isiginngitsuusaarnerat naammaleqaaq, Marie Peary allappoq.
Qilalukkat akissaqartitsisarput
Marie Pearyp nalunaarutaa naapertorlugu qilalugartassiissutit Naalakkersuisunit qaffanneqarpata piniartunut tamanna iluaqutaangaatsiassaaq. Taassuma saniatigut piumasaqarpoq iliuusissatut pilersaarummik piaartumik suliaqartoqassasoq, imminut pilersornerup annertusinissaa anguniarlugu.
Aalisarnermut, piniarnermut nunalerinermullu ataatsimiititaliap Qaanaami Ittoqqortoormiinilu piniartut ukiup sinnerani imminut pilersorsinnaanissaat angujumallugu qilalugartassiinissamik aamma kaammattuuteqarput.
Inuussutissarsiornermut aatsitassarsiornermullu naalakkersuisoq, Jens-Frederik Nielsen pingasunngornermi apeqqarissaarfigineqarami ilisimatitsivoq amminik tunitsiviit ammatinniarneqarnerisa ajornartorsiutaanerannut Naalakkersuisut sulissuteqartut. Sulissuteqarneq Qaanaamut, Ittoqqortoormiunut nunaqarfinnullu attuumassuteqarpoq.